Uıaly telefondardy SMS arqyly onlaın tirkeýge bolady - Abaev

ASTANA. QazAqparat - Qazaqstanda uıaly telefondardy SMS arqyly onlaın tirkeýge múmkindik berilmek. Bul týraly búgin Qoǵamdyq keńes otyrysynda QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat tilshisi.

«Telekommýnıkatsııa salasynda kelesi jumystar atqaryldy. Ótken jyly aýyldyq eldi mekenderdi keń jolaqty ınternetpen qamtý jobasy boıynsha tyńǵylyqty jumystar júrgizildi. Jobanyń maqsaty - 2021 jylǵa deıin 1 249 eldi mekende turyp jatqan 2 mıllıonnan astam turǵyndy jyldam ınternetpen qamtamasyz etý. Aǵymdaǵy jyly barlyq konkýrstyq protsedýralar júrgizilgennen keıin 55 aýyldyq eldi mekendi qamtımyz dep úmittenemiz», - dedi mınıstr.

Sonymen qatar Dáýren Abaev uıaly baılanystyń abonenttik qurylǵylaryn tirkeýge qatysty da pikir bildirdi. Onyń aıtýynsha, ótken jyly bul baǵytta daıyndyq jumystary júrgizilip, búginde sáıkesinshe erejesi bekitilgen. Halyq arasynda dúrbeleń oryn almaýy úshin mınıstrlik tirkeý protsesin barynsha jeńldetip otyr. Tipti, azamattar onlaın rejimde jáne SMS arqyly da uıaly telefonyn tirkeýge múmkindik alady.