Uıaly telefon, Internet, teledıdarsyz da ómir súrýge bolady -«Altynemel» parkiniń ınspektory
- Bolatbek, siz shalǵaı jatqan jerde ómir súrip jatyrsyz. Bul jerde siz qandaı qyzmet atqarasyz?
- Men - «Altynemel» memlekettik ulttyq tabıǵı parkiniń Qosbastaý kardonynyń ınspektorymyn. Osy jerde maǵan júktelgen jumys óte aýqymdy. Qaramaǵyma tıesili 20 myń gektar jer bar. Sol jerdi kúzetip, baqylap otyramyn.
- Túsingenim, siz osy jerde otbasyńyzben birge turasyz ba?
- Iá, bala-shaǵam ózimmen birge. Úsh balam jáne jarymmen osy jerde turyp jatqanymyzǵa úsh jyl boldy.
- Bul jer en dalada ornalasqan ǵoı. Balalaryńyz mektepke qaıda barady?
- Qazir demalys ýaqyty bolǵandyqtan, balalarymyz ózimizben birge. Al oqý maýysymy bastalǵanda Nurym aýylyndaǵy ata-ájesiniń úıinde turyp bilim alady.
- Baıqaǵanym, bul jerde telefon, teledıdar joq eken. Mundaı ómir siz úshin qanshalyqty qyzyqty?
- Iá, uıaly telefon, teledıdar bul jerde joq. Biz ózimizdiń basshylyǵymyzben arnaıy ratsııa arqyly baılanysqa shyǵamyz. Jańalyqtardy týystarymyzdan estip otyramyz. Al azyq-túligimizdi 20 shaqyrymdaı jerde ornalasqan aýyldan jetkizemiz.
- Joldasyńyz jumys isteı me?
- Joldasym osy jerde kardonnyń kógaldandyrýshysy.
- Siz úshin park ınspektory bolý qanshalyqty qyzyqty?
- Meniń ákem, Abylqas Aqbaev, «Altynemel» parki qurylǵan ýaqyttan beri qyzmet etti. 18 jyldan astam ter tókti. Osy jerden zeınetke shyqty. Men - sol ákemniń izin jalǵastyrýshymyn. Jumysym ózime unaıdy. Bul jerdiń tabıǵaty keremet.
- Osy kardonǵa kelýshiler bar ma?
- Árıne, ásirese, týrıster kóp keledi. Osy jerde 700 jyldyq tarıhy bar tal ósip jatyr. Sony kórýge keledi. Demalady. Taza aýa, bulaq sýy, ań-qus keremet emes pe?! Dál osy jerde eki bulaq bar. Sondyqtan bizdiń kardon «Qosbastaý» dep atalady.
- Balalaryńyz úshin bul jerdegi ómir qanshalyqty qyzyqty?
- Balalarym jaz boıy baqshaǵa qarap, anasyna kómektesip, eńbekke aralasady. Bir kúni bos ótpeıdi. Maǵan da qolǵanat. Birge aýmaqty qaraımyz. Tabıǵat anany qorǵaýǵa óz úlesterin qosady.
***
Bolatbektiń joldasy Ásem Omyshova da ózine osyndaı ómir jaıly ekenin aıtady. Kúndelikti kúıbeń tirlikten tipti ýaqyt ta jetpeı jatady deıdi.
Jalpy «Altynemel» ulttyq parkinde negizgi úsh telim bar. Úshinshi telimniń basshysy Janat Nesipbaı park aýmaǵynda óte shalǵaı kardondar ornalasqanyn aıtady. Máselen, park keńsesi ornalasqan Basshı aýylynan 150 shaqyrym jerde, taýly aımaqta ómir súrip jatqan ınspektorlar bar. Olar úshin de teledıdar, uıaly telefon degen qyzyq emes. Jalpy Altynemel parkinde 31 kardon bar.
Aıta keteıik, bıylǵy jyldyń 12-15 maýsym aralyǵynda ıÝNESKO-nyń Parıjdegi shtab-páterinde «Adam jáne bıosfera» baǵdarlamasy halyqaralyq úılestirý keńesiniń kezekti sessııasy ótip, onda elimizdiń «Altynemel» men Qarataý qoryǵy ıÝNESKO-nyń dúnıejúzilik tizimine endi.