Uıaly telefon arqyly jumys tabýǵa bolady
ASTANA. QazAqparat - Qazaqstannyń elektrondy eńbek bırjasy resmı túrde ashylady, dep habarlaıdy QazAqparat tilshisi.
QR Eńbek jáne halyqty áleýmettik qorǵaý vıtse-mınıstri Nurjan Áltaevtyń aıtýynsha, qazirgi kezde www.enbek.kz saıty pılottyq rejımde jumys istep jatyr.
«Kelesi aptada biz atalǵan elektrondy eńbek bırjasyn resmı túrde iske qosatyn bolamyz. Qazirdiń ózinde saıtqa kirip, respýblıka boıynsha bos jumys oryndaryn tabýǵa bolady. Bolashaqta barlyq kompanııalar elektrondy eńbek bırjasyna óz vakansııalaryn ornalastyrsa, jumys izdeıtin azamattar óz túıindemelerin jarııalaı alady. Osynyń arqasynda jumys berýshiler úshin qajetti mamandy tabýǵa múmkindik bar», - dedi N.Áltaev búgin Astanada ótken baspasóz máslıhatynda.
Onyń sózine qaraǵanda, elektrondy eńbek bırjasy arqasynda kez kelgen azamat uıaly telefonymen jumys taba alady.
«Endi jumysshylar men jumys berýshiler uıaly telefon arqyly ózine qajetti qyzmetti de, mamandy da taba alady. Búginde atalǵan aqparattyq bazada 38 myń kásiporyn óz vakansııalaryn, al 36 myń adam óz túıindemelerin ornalastyrdy. Osy ýaqytqa deıin 17 myńnan astam adam elektrondy eńbek bırjasy arqyly jumysqa turdy», - dep atap kórsetti N.Áltaev.
