Uıaly baılanystyń quny men qyzmet kórsetý sapasy eshqandaı syn kótermeıdi - Májilis depýtaty S. Áıimbetov
ASTANA. 28 mamyr. QazAqparat - Áli de uıaly baılanystyń quny men qyzmet kórsetý sapasy eshqandaı syn kótermeıdi.
Bul týraly búgin Parlament Májilisinde aqparattyq kommýnıkatsııa tehnologııalary salasyn damytý qorytyndylary taqyrybynda ótken Úkimet saǵatynda Ekonomıkalyq reforma jáne óńirlik damý komıtetiniń tóraǵasy Seıitsultan Áıimbetov málim etti.
Depýtattyń aıtýynsha, telekommýnıkatsııa salasynyń damýyndaǵy nysanaly ındıkatorlar sońǵy eki jylda tarıfter baǵasynyń arzandaýymen qatar baılanys qyzmetin kórsetýdiń de ósip kele jatqanyn kórsetedi. «Bul rette statıstıkalyq derekterge júginbeı-aq, biz halyqtyń 100 paıyzynan astamy uıaly baılanyspen qamtylǵanyn maqtanyshpen aıta alamyz. Árıne, bul zor jetistik. Alaıda, álide de uıaly baılanystyń quny men qyzmet kórsetý sapasy eshqandaı syn kótermeıdi. Máselen, Halyqaralyq valıýta qorynyń 2010 jylǵy derekteri boıynsha TMD elderi naryqtarynda uıaly baılanystyń bir mınýttyq quny Qazaqstanda 18,35 teńgeni qurasa, ol Qyrǵyzstanda - 3,2, Ózbekstanda - 4,47, Grýzııada - 7,49, Ýkraınada - 9,86 teńgeni quraǵan. Bul oraıda, bizde osy qyzmet baǵasynyń ósip kele jatqany baıqalady. Máselen, 2010 jyly baǵanyń ortasha ósimi 2008 jylmen salystyrǵanda 7,6 paıyzdy qurady», - deıdi depýtat.
Bul rette Seıitsultan Áıimbetov baılanys operatorlarynyń basqa jelilerge qońyraý shalýǵa arnalǵan «ústeme tarıfteri» halyqqa salmaq salyp, olar abonenttiń tólemin eki ese kóbeıtip otyrǵanyn alǵa tartady.
«Eger 2011 jyly «jeli ishinde» qońyraý shalýǵa biz ortasha 13 teńge tólesek, «basqa jelilerge» 28 teńge tólep keldik. Bul, aıyrmashylyq árıne birden seziledi. Biz, Qazaqstannyń barlyq uıaly balanys operatorlarynyń 4 jáne odan da kóp «sım-kartasyn» nemese uıaly telefonyn birdeı paıdalanyp júrgen abonentterdi ázirshe bilmeımiz. Múmkin olar bar da shyǵar. Biraq mundaı múmkindik qarapaıym adamdardyń kópshiliginde bola bermeıdi. Statıstıkalyq derekter qazaqstandyq operatorlardyń tabysynyń jyl saıyn ósip kele jatqanyn kórsetedi. 2010 jyly mundaı tabys 261 mlrd. teńge bolyp, 2009 jylmen salystyrǵanda 8,5 paıyzǵa ósken. Sondyqtan, barlyq uıaly baılanys operatorlarynyń basqa jelilerge qońyraý shalýǵa arnalǵan ústeme-tarıfterdi alyp tastaıtyn ýaqyty jetti dep oılaımyz. Óıtkeni bul operator-kompanııalar osy jelilerdi (ınfraqurylym, ofıs jáne t.b.) damytýǵa salǵan óz kúrdeli qarjysyn baıaǵyda ótep alǵan», - deıdi depýtat.
