Uıaly baılanysty buǵattaıtyn qurylǵylardan qandaı problemalar bolýy múmkin
ASTANA. QazAqparat - Búgin Parlament Májilisiniń jalpy otyrysynda depýtat Keńes Absatırov GSM-sıgnaldyń taralýyn buǵattaıtyn qurylǵylardyń emin-erkin satylýyna alańdaýshylyq bildirdi. Osy oraıda ol QR Úkimet basshysy Baqytjan Saǵyntaevtyń atyna depýtattyq saýal joldady, dep habarlaıdy QazAqparat.
«Aqparattyq tehnologııalardyń damýy aıasynda uıaly baılanystyń qazaqstandyq operatorlary qyzmet kórsetý aýmaǵyn keńeıtýmen qatar, quqyq qorǵaý organdarynyń tikeleı talaby boıynsha kerisinshe uıaly baılanysqa qoljetimdikti shekteı de alady. Operatorlardan bólek, GSM-sıgnaldy buǵattaý úshin arnalǵan tehnıkalyq qurylǵylardyń kómegimen baılanysty shekteý múmkindigi de bar. Bul qadamdar qaýipsizdikti qamtatasyz etý maqsatynda jedel-izdestirý sharalary kezinde jáne ulttyq qaýipsizdik turǵysynda lańkestik qaterlerdiń aldyn alý barysynda iske asyrylady», - dep toqtaldy depýtat.
Osy oraıda ol Úkimet qaýlysyna sáıkes, QR Ulttyq qaýipsizdik komıteti jedel-izdestirý sharalaryn júrgizý úshin arnalǵan arnaıy tehnıkalyq qurylǵylardy jóndeý, óndirý boıynsha lıtsenzıar bolyp belgilengenin eske salyp ótti. Onyń paıymynsha, bul sharalar men tıisti shekteýler tolyq negizdi bolyp otyr.
«Alaıda keıingi kezde uıaly baılanysty buǵattaýshy qurylǵylar UBT ótkizý kezinde bilim berý júıesinde keńinen paıdalanylady. Máselen, memlekettik satyp alýlar portalynda osyndaı «buǵattaýshy» quryldardy satyp alý týraly bilim mekemelerinen ótinimderdi kórýge bolady. Sonymen birge, búginde saıttar men áleýmettik jelilerde bul qurylǵylardyń jumys isteý sıpattamasynan bólek, olardy qolaıly baǵamen satyp alý múmkindigi baıqalady», - dedi Keńes Absatırov.
Osy oraıda depýtat qoldanystaǵy zańnama «buǵattaýshy» quraldardy elge alyp kelý, satý jáne paıdalaný boıynsha qandaı da bir normalardy qarastyrmaıtynyn atap ótti. Sáıkesinshe, olardy taratýshylar men paıdalanýshylardyń is-qımyldary shektelmegen.
Atalǵan arnaıy qurylǵylar paıdakúnemdik maqsattarda eleýli túrde ekonomıkalyq ári áleýmettik zalal keltirýi yqtımal. ıAǵnı osy qurylǵylardyń jumys isteý sıpattamasy GSM-sıgnaldy buǵattaýǵa baǵyttalǵandyqtan, bul rette lańkestik qater týyndaǵan kezde qutqarý qyzmetteri men qaýipsizdik qyzmetteri sıgnaldary jumysyna kedergi jasalýy múmkin.
Sonymen qatar tólem termınaldarynyń, bankomattardyń, shuǵyl jaǵdaılarda habar taratý barysynda symsyz júıelerdiń jumystary buzylady. Munymen qosa, kez kelgen adam atalǵan qurylǵyny óziniń páterinde qosyp, mańyndaǵy úılerdi baılanystan ajyrata alady.
K. Absatırov atalǵan máselelerdi eskere otyryp, bul salada týyndaıtyn problemalardy tyńǵylyqty zertteý boıynsha jaýapty qyzmetterge tıisti tapsyrma berýdi surady.
