Uıaly baılanys sapasyn «Halyqtyq baqylaý» baǵdarlamasy qadaǵalaıtyn bolady
ASTANA. QazAqparat - «Halyqtyq baqylaý» mobıldi qosymshasyn qurý josparlary týraly Qazaqstan Respýblıkasy Investıtsııalar jáne damý mınıstrligi Baılanys, aqparattandyrý jáne aqparat komıtetinde (QR IDM BAA) ótken baılanys operatorlarynyń otyrysynda qaraldy, dep habarlaıdy atalǵan vedomstvonyń baspasóz qyzmeti.
Qazaqstan Respýblıkasy ınvestıtsııalar jáne damý vıtse-mınıstri Sáken Sársenovtiń tóraǵalyǵymen ótken otyrysqa «UAT» AQ, «Kcell» AQ, «Mobaıl Telekom-Servıs» JShS, «Kar-Tel» JShS, «ALTEL» AQ jáne «Qazaqtelekom» ókilderi qatysty.
«Búgin aımaqtarda ǵana emes, sonymen qatar Astana qalasynda da uıaly baılanys sapasy bizdiń talaptarǵa saı kelmeıtin jerler bar. Onyń sebepterin anyqtap, olardy mindetti túrde joıý kerek. Bundaı jumysty únemi júrgizip otyrý qajet», - dedi vıtse-mınıstr. «Halyqtyq baqylaý» baǵdarlamasyn ázirleýshilerdiń aıtýynsha, ol uıaly úkimettiń qosymshasy retinde jumys istep, baılanys sapasyna qatysty shaǵymdar men sýretterdi qabyldaıtyn bolady.
Jiberilgen aqparat Baılanys, aqparattandyrý jáne aqparat komıtetine jáne mamandandyrylǵan ólsheý jabdyqtyń kómegimen baılanys sapasyna monıtorıng jáne tekserý ótkizetin «Memlekettik tehnıkalyq qyzmet» RMK tikeleı jetkiziletin bolady.
Usynylatyn qyzmetter sapasynyń tómendeýine qatysty máselelerdi sheshý maqsatynda, monıtorıng nátıjeleri baılanys operatorlaryna jiberiletin bolady. Operatorlar baılanys sapasyn jaqsartý úshin qajetti shara qoldanbaǵan jaǵdaıda ákimshilik jazaǵa tartylatyn bolady.
Bul áreketter uıaly baılanys jelileriniń jumysyn tekserý barysynyń ashyqtyǵyn jáne tıimdiligin arttyrýǵa, operatorlardyń shyǵyndaryn azaıtýǵa jáne abonenttermen baılanysty nyǵaıtýǵa múmkindik beredi.
Operatorlar men uıaly baılanys abonentteri «Halyqtyq baqylaý» mobıldi qosymshasyn tegin paıdalana alady.
