Uıaly baılanys operatory Almaty oblysynyń zardap shekken turǵyndaryna qaıyrymdylyq SMS-aktsııasyn jarııalady
ALMATY. Naýryzdyń 19-y. QazAqparat /Erlik Erjanuly/ - Búgin Almatyda «Beeline» Almaty oblysy, Aqsý aýdany Qyzylaǵash aýylynyń sý tasqynynan zardap shekken turǵyndaryna kómek retinde qaıyrymdylyq SMS-aktsııasyn jarııalaıtyny týraly málimdeme taratty,
dep habarlaıdy QazAqparat.
«Bul oqıǵadan Beeline syrt qala almady. Kompanııada kútpegen apattan zardap shekken aýyl turǵyndaryna arnap kıim-keshek, azyq-túlik jáne gıgıenııalyq zattardy jınaý bastaldy. Sonymen qatar Qyzylaǵash aýylynyń turǵyndarynyń basym bóligi oralmandar ekenin bilgennen keıin olardy týystarymen baılanystyrý úshin baılanyspen qamtamasyz ettik. Bizdiń qyzmetkerler zardap shekkender ornalastyrylǵan aýrýhanalar men jataqhanalarǵa baryp, olardy álemniń kez-kelgen núktesimen baılanysýǵa múmkindik berdi. Biz endi arnaıy ashylǵan 911 qysqa nómirine júreginde jylýy bar árbir azamat kútpegen apat zardabyn joıýǵa óz úlesin qosady dep úmittenemiz» deıdi «KaR-Tel» JShS-niń marketıng jónindegi dırektsııa dırektory Aınur Ábjanova. Onyń sóizne qaraǵanda, akktsııaǵa qatysýǵa yntalylyq bildirgen Beeline-nyń árbir abonenti 911 qysqa nómirine sheksiz SMS-habarlamasyn jibere alady. Bir habarlamanyń quny - 100 teńge turady. Aktsııadan túsken barlyq qarajat Almaty oblysynyń mobılızatsııalyq daıyndyq, azamattyq qorǵanys, apatty jáne kútpegen apattyń aldyn alý jáne joıý basqarmasynyń esep-shotyna aýdarylady.
