Uıaly baılanys operatorlary tirkelmegen sım-kartalardy óz qyzmetinen ajyratady
ASTANA. QazAqparat - Sońǵy kúnderi Qazaqstannyń uıaly baılanys operatorlarynyń resmı saıttarynda sım-kartalar jeke tulǵanyń atyna rásimdelmegen jaǵdaıda bıylǵy 1 jeltoqsannan bastap bundaı abonentterge qyzmet kórsetý toqtatylatyny jaıynda eskertýler jasalǵan.
«QR Investıtsııa jáne damý mınıstrliginiń Baılanys, aqparattandyrý jáne aqparat komıtetiniń 2014 jylǵy 10 qazandaǵy talaby boıynsha, tirkelmegen abonenttik nómirlerdi paıdalanýshylar 2014 jylǵy 30 qarashaǵa deıin osy nómirlerdi rásimdeý qajettigi týraly habarlanady. Joǵaryda atalǵan talapqa saı, tirkeý málimetteri joq abonenttik nómirlerge 2014 jylǵy 1 jeltoqsannnan bastap uıaly baılanys qyzmetin kórsetý toqtatylady. Abonenttik nómirlerdi tirkeý máseleleri boıynsha shuǵyl túrde operatorlardyń satý jáne qyzmet kórsetý keńsesine habarlasý kerek»,-delingen uıaly baılanys operatory málimetterinde.
«Vremıa» gazetiniń jazýynsha, quqyq qorǵaý organdarynyń tarapynan uıaly baılanys qyzmetin tirkelmegen paıdalanýshylar qoldanyp júrgendigi týraly shaǵymdar kóp túsetin kórinedi.
Baılanys, aqparattandyrý jáne aqparat komıteti tóraǵasynyń orynbasary Dmıtrıı Golobýrdanyń sózine qaraǵanda, bıylǵy jarty jylda qarjy polıtsııasy 4,5 myń uıaly nómirler boıynsha aqparatty surastyrǵan eken, alaıda osy árbir úshinshi abonent boıynsha aqparat bolmaı shyqqan.
Atap aıtqanda, osydan biraz jyl buryn sım-kartalardy arnaıy qurylǵan JShS-lar satyp alyp, nómirlerdi ózderine rásimdegen bolatyn. Keıin olar bul nómirlerdi jeke adamdarǵa satty. Sonymen qatar tirkeýden jaltarýdyń taǵy bir joly nómirlerdi dıllerlerden satyp alýǵa baılanysty. Olar kóptegen nómirlerdi bir adamǵa rásimdeıdi, keıin sım-kartalar túrli adamdarǵa satylady.
