Uıaly baılanys operatorlary sms-terdiń keshigip jetýiniń sebebin atady
ASTANA. QazAqparat - Uıaly baılanys operatorlary mektepte sabaqtyń bolmaıtyny týraly SMS-habarlamalar nege kesh keletinin túsindirdi, dep habarlaıdy QazAqparat.
Aıaz qysqan aımaqtardaǵy mektepterde sabaq jıi toqtatylýda. Mektepte sabaq bolmaıtyny týraly aqparatty Tótenshe jaǵdaılar departamentteri uıaly baılanys operatorlary arqyly habarlap otyr. Alaıda keıbir abonentterge sabaqtyń bolmaıtyny týraly sms-habarlama keshigip jetetindi shyǵardy.
Altel jáne Tele2 kompanııalarynyń PR-dırektory Oljas Bıbanov «QazAqparat» tilshisimen bolǵan jeke áńgimede sms-habarlamalardyń mezgilinen keshigip jetýiniń sebebin uıaly baılanys operatorlarynyń qural jabdyǵy bir saǵatta tek 300 myń abonentke habarlama joldaı alatynymen túsindirdi.
«Menińshe, barlyq uıaly baılanys operatorlarynda jaǵdaı uqsas. Abonentter sany 500 myńǵa, tipti mıllıonnan asatyn Almaty jáne Shymkent sııaqty iri qalalarda push-habarlamalar jetkizý úshin ýaqyt kerek. Sebebi operatordyń arnasyndaǵy ótkizý qabileti shekteýli. SMS-habarlamalardy birden barlyǵyna jiberý múmkin emes. Mınýtyna birneshe myń abonentke SMS joldanady. Arna budan kóp ótkize almaıdy. Munda eki jaıt bar, iri qalalarda Tele2 kompanııasy úshin SMS-habarlamalardy jetkizý 3 saǵatqa deıin ketedi. Keıde Tótenshe jaǵdaılar departamenti aqparatty kesh beredi. Olar bizdiń 3 saǵat ishinde habarlamalar taratatyndyǵymyzdy biledi. Ekinshiden, mıllıondyq bazaǵa birden habarlamalar taratý múmkin emes», - dedi Oljas Bıbanov.
«Aldyńǵy jyly Almatyda bizde problema boldy, bizdi seldiń júretini týraly aqparatty kesh berdi dep synady. Biraq barlyǵy biledi, SMS-habarlamalar jedel qulaqtandyrý quraly bolyp tabylmaıdy. Televızııa, radıo, sırena - bular dabyldy jedel jetkizýshi quraldar. Almatyda arnanyń ótkizý qabiletine baılanysty habarlama taratý ýaqyty 6 saǵatqa deıin sozylýy yqtımal. Saǵatyna 300 myń SMS joldanady. Barlyq operatorlardyń jaǵdaıy osy», - dep atap ótti ol.
Aıta keteıik, áleýmettik jelilerde mektepte sabaq bolmaıtyny týraly habarlamanyń kerekti kezden kesh kelgenin aıtyp, ata-analar shaǵym aıtýda.
