Uıaly baılanys operatorlary qyzmet tarıfterin tómendetkeni týraly málim etti
ASTANA. Tamyzdyń 8-i. QazAqparat. Bul málimdeme Operatorlar keńesiniń kezekti jıynynda aıtyldy. Baılanys jáne aqparat mınıstrliginiń tarıfterdi tómendetý týraly usynysy uıaly baılanys naryǵynyń barlyq qatysýshylarynyń qoldaýyn tapty,
dep habarlaıdy mınıstrliktiń baspasóz qyzmeti.
Kezdesý barysynda belgili bolǵandaı «GSM Qazaqstan «Qazaqtelekom» AAQ» kompanııasy eń qymbat mınýttyń qunyn 29-dan bastap 19 teńgege deıin túsirýdi josparlaýda. Mınýttyń ortasha quny 9 teńgeni quraıdy. «Kartel» JShS berilgen usynysty qoldap, tarıfteriniń uqsas tómendeýin málimdedi. «Mobaıl Telekom Servıs» JShS-nyń ishki jelidegi tarıfteri de mınýtyna 19 teńgeden aspaıtyn bolady.
QR Baılanys jáne aqparat mınıstri Asqar Jumaǵalıev «operatorlardyń qyzmetterge degen tarıfterdi tómendetýi tutynýshylar tarapynan sózsiz baǵalanady», dep atap ótti. Sonymen birge, Baılanys mınıstrliginiń basshysy - Mınıstrlik budan ári de osy baǵytta tıisti jumystar atqaratyndyǵyn aıtty. Operatorlar da únemi osy suraqqa mán berip otyrýy tıis jáne ýaqyt aǵymy men tutynýshylardyń qajettiligin eskere otyryp, óziniń tarıftik saıasatyn retteýi tıis.
«Interkonnekttiń»tarıfterin tómendetý máselesi de zeıinsiz qalmady. «GSM Qazaqstan «Qazaqtelekom» AAQ» kompanııasynyń Bas atqarýshy dırektory Veısel Aral, kompanııa jalpy jeliaralyq birigýlerge degen stavkany 20% tómendetýge daıyn dedi. «Kartel» JShS-nyń Bas dırektory Anatolıı Popov bolsa, usynysty qoldaı otyra, birden tómendetý bolmaý kerek, áıtpese kompanııa ekonomıkasyna nuqsan keletinin aıtty. Al, «Mobaıl Telekom Servıs» JShS-nyń Bas dırektory Andreı Smelkov «ınterkonnekt» stavkalarynyń áldeqaıda tómendeıtini týraly oıyn bildirdi. «Biz Mınıstrliktiń usynysyn qoldaımyz jáne ınterkonnekt tarıfterin daýystyq trafıkti ótkizýi úshin mınýtyna 19,98 teńgeden 5,04 teńgege deıin tómendetýdi usynamy» dedi.
Interkonnektke degen salym memleketpen rettelmeıtindikten, Mınıstr kezdesýge qatysýshylardan jeliaralyq baılanysýlar tarıfin 20 paıyzǵa tómendetýdi qarastyrýdy jáne bir kelisimge kelýdi, sondaı-aq, odan ári tómendetý suraqtaryn qarastyrýdy usyndy.
ANYQTAMALYQ:
Qazaqstan Respýblıkasynyń Baılanys jáne aqparat mınıstrligi osy jyldyń naýryz - sáýir aılarynda uıaly baılanystyń qunyna baılanysty jaǵdaıdy taldap ótti. Ótkizilgen taldaý, basqa eldermen salystyrǵanda, tarıfterdiń joǵarǵy deńgeıin kórsetti. «GSM Qazaqstan «Qazaqtelekom» AAQ» kompanııasynyń ishki jelilerinde telefon shalýǵa degen ortasha tarıf mınýtyna 21 teńgeni qurady. Bul «Kartel» JShS-da tarıfterine teń keledi. Ol Reseı uıaly baılanys operatorlarynyń ishki jelidegi tarıften eki ese artyq bolyp keledi.
Mınıstrlik uıaly baılanys operatorlaryna óziniń tarıftik saıasatyn qaıta qarastyrý men qyzmet qunyn tómendetý jóninde usynys jasady.
Operatorlar keńesiniń otyrysy barysynda, uıaly baılanys operatorlarynyń jelileri arqyly ótetin telefon trafıginiń tarıfterin qaıta qarastyrý týraly sheshim qabyldandy. Operatorlardyń pikirinshe, «ınterkonnekttiń» joǵarǵy stavkalary, tarıfterdiń qymbattaýynyń birden-bir sebebi bolyp keledi.
Mobıldik operatorlardyń arasyndaǵy ınterkonnektiniń baǵasy búgin Qazaqstanda 19,98teńge quraıdy (ol Reseı tarıfterinen 4,5 esege artyq (4-5 teńge), Túrkııadan 2,7 ese artyq (7,4 teńge), EQ elderinen 1,5 -2,5 ese artyq (9-16,7 teńge).
«Interkonnekt»-jelige basqa uıaly operatordyń qosylýyna tólenetin aqy. Qazaqstannyń Baılanys operatorlarynyń keńesi - Qazaqstan Respýblıkasynyń Baılanys jáne aqparat mınıstrliginiń janyndaǵy keńesshi organ. Oǵan telekommýnıkatsııalyq qyzmet kórsetetin barlyq kompanııalardyń jetekshileri kiredi. Kezdesý aı saıyn ótkizilip, onda ózekti máseleler qaralady.
