Uıaly baılanys naryǵyna jańa operatorlardyń shyǵýyn ne shektep otyr

ASTANA. QazAqparat – Qazaqstandaǵy uıaly baılanys naryǵy monopolııalanǵan. Sondyqtan, basqa baılanys operatorlarynyń naryqqa shyǵýy múmkin emes. Bul týraly Básekelestikti qorǵaý jáne damytý agenttigi ashyq talqyǵa shyǵarǵan konsýltatıvtik qujatta jazylǵan, dep habarlaıdy QazAqparat tilshisi.

«5G jıilikterin bólý boıynsha sońǵy aýktsıonnyń qorytyndylary onyń sheńberinde radıojıilik spektriniń «Qazaqtelekom» kompanııalar tobyna berildi. Osylaısha, uıaly baılanys naryǵynyń monopolııalanýyn kúsheıtti. Bul rette, aýktsıondardyń qorytyndylary jeke operatorlardyń kvazımemlekettik sektormen aýktsıondarda básekege túse almaıtyndyǵyn kórsetti. Sonymen, «Beeline» jáne «Freedom Holding Corp» sııaqty áleýetti operatorlar «Qazaqtelekom» jáne onyń mobıldi operatorlarynyń birikken konsortsıýmyna qarsy tura almady», - dep másele kótergen agenttik.

Vedomstvo dereginshe, radıojıilikterdi ıelený boıynsha «Qazaqtelekomǵa» naryqtyń 82 paıyzy, «KaR-Tel» jaýapkershiligi shekteýli seriktestigine 18%-y tıesili. Bul jańa operatorlardyń naryqqa shyǵýyna kedergi bolyp otyr.

«Uıaly baılanys naryǵy monopolııalanǵan. Osyǵan baılanysty monopolııalyq oıynshylardyń radıojıilikti satyp alýǵa qatysýyn shekteý tetigin engizý qajet. Onsyz basqa baılanys operatorlarynyń naryqqa shyǵýy múmkin emes», - dep agenttik atalǵan máseleniń sheshimin usynǵan.