Uıaly baılanys qyzmeti men qysqa habarlamalar servısi arqyly alaıaqtyqtyq jasaý oqıǵalary jıilep otyr
ALMATY. 13 jeltoqsan. QazAqparat /Erlik Erjanuly/ - Búgin Almaty GSM Qazaqstan uıaly baılanys qyzmeti men qysqa habarlamalar servısi arqyly jıilep ketken telefondyq alaıaqtyq jaǵdaılary týraly habarlama taratty.
«Zańnama boıynsha uıaly baılanys operatory kúdikti mazmundaǵy nemese jalǵan aqparaty bar qysqa habarlamalardy joldaıtyn nómirlerge qatysty qandaı da bir belsendi áreket júrgizýge quzyretsiz. Alaıaqtyqpen kúres - quqyq qorǵaý organdarynyń jaýapkershiliginde. Óz tarapymyzdan biz shuǵyl-izdestirý jáne tergeý sharalaryn júrgizý barysynda árdaıym kómek kórsetýge daıynbyz», - deıdi GSM Qazaqstan/Kcell kompanııasynyń Korporatıvtik kommýnıkatsııalar jónindegi departamenti dırektory Aıda Dosaeva. Onyń aıtýynsha, zardap shekken abonentterdiń az bóligi ǵana quqyq qorǵaý organdaryna nemese baılanys operatoryna habarlasady. Bul alaıaqtarǵa óz áreketterin odan ary jalǵastyrýǵa múmkindik berýde. Ókinishke oraı, mobıldi alaıaqtyq áli de oryn alyp keledi jáne búgingi tańda abonentter úshin eń utymdy sheshimderdiń biri - bul qaskúnemderdiń aılasyna túspeı, beıtanys nómirden kelgen kúdikti qońyraýlar men habarlamalarǵa jaýap bermeý.
«Biz abonentterden ár kúdikti jaǵdaı týraly aqparattyq-anyqtamalyq qyzmetke habarlasýlaryn suraımyz, sondaı-aq ótkizilip otyrǵan marketıngtik naýqandar men utystardy SMS-te kórsetilgen uıymdardan naqtylaýlaryn usynamyz», - deıdi Aıda Dosaeva. Osy maqsatpen Kcell kompanııasy abonentterdiń mobıldi saýattylyǵyn ashý aıasynda qarqyndy jumys júrgizýde. Klıenttermen jumys isteý departamentinde alaıaqtyq jaǵdaılary boıynsha abonentterdiń habarlasýlaryn tirkeıtin, sondaı-aq mobıldi alaıaqtyq túrlerine baqylaý jáne taldaý júrgizetin baqylaý jáne esepke alý bólimi quryldy. Mobıldi alaıaqtyq máselesiniń áleýmettik sıpatqa ıe bolyp, keń etek jaıýyna baılanysty korporatıvtik saıttarynda arnaıy bólim ashyp, onda mobıldi alaıaqtyqtyń tanymal sulbalaryn, alaıaqtardyń áreketterine urynbaý joldaryn usynady. Sondaı-aq abonent aldanyp qalǵan jaǵdaıda ne isteý qajettigine qatysty keńester beriledi.
