«Uıalmaısyńdar ma»: Kegen aýdany ákiminiń orynbasary jol salýshylarǵa eskertý jasady
QONAEV. KAZINFORM – Almaty oblysy, Kegen aýdany ákiminiń orynbasary Medet Isaev respýblıkalyq mańyzy bar Kókpek-Kegen-Túp jolyn jóndep jatqan jumysshylarǵa eskertý jasady.
Aýdan ákimdiginiń Instagram áleýmettik jelisinde sapasyz jóndelip jatqan joldyń vıdeosy jarııalandy. Kadrdan Kegen aýdany ákiminiń orynbasary Medet Isaevtyń tóselgen asfalttyń astyn kúrekpen arshyp jatqanyn kórýge bolady.
Aýdan ákiminiń orynbasary respýblıkalyq mańyzy bar Kókpek-Kegen-Túp avtokólik jolynyń 53-68 km aralyǵyndaǵy júrgizilip jatqan jóndeý jumystarynyń sapasyn tekserip, merdiger kompanııanyń ókiline qatań eskertý jasap, avtokólik jolynyń sapasyn arttyrý boıynsha birqatar tapsyrma berdi.
Almaty oblysynyń ákimdigi atalǵan jol ýchaskesine baılanysty erteń baspasóz týry uıymdastyrylatynyn jetkizdi.
Eske sala keteıik, buǵan deıin Almatyda jańa tóselgen asfalt jabynyn sý shaıyp ketkenin jazǵan bolatynbyz.