Uıaly telefon urlyǵynan qalaı saqtanýǵa bolady
Elimizde qazir urlyq qylmysynyń ishinde uıaly telefon urlyǵy kóp taraǵan. Bul turǵyndarǵa eleýli zııanyn tıgizedi. Odan saqtaný joly qandaı? Kazinform atalǵan taqyrypqa baılanysty Qyzylorda oblysy Polıtsııa departamenti bastyǵynyń orynbasary, polıtsııa polkovnıgi Іlııas Jumaǵulovtyń keńesine nazar aýdardy.
Ońaı jolmen aqsha tabýdy kózdegen azamattar urlaýǵa da, satýǵa da ońaı qalta telefondaryn jymqyrýdy ádetke aınaldyrǵan. Olar óz oıyn adam kóp shoǵyrlanǵan oryndarda, saýda úıleri men qoǵamdyq kólikterde júzege asyrady.
«Uıaly gadjetti qońyraý shalýǵa surap, ashyqtan-ashyq alyp ketetin jaǵdaılar da tirkelýde. Beıtanys adamdarǵa uıaly telefondy usynýdan aýlaq bolyńyzdar. Jáne smartfonǵa qupııa kod ornatyp, kıimińizdiń aldyńǵy qaltasynda saqtańyz. Eger atalǵan qylmystyń qurbany bolǵan jaǵdaıda, múlkińizdi qaıtarý úshin tómendegi áreketterdi jasańyz. Telefon urlyǵy týraly, polıtsııa bólimshesine habarlańyz. Múliktiń sizge tıesili ekenin rastaıtyn qujattar men chekti, kepildik talony men telefon qorabyn alýdy umytpańyz. Jeke IMEI kodyńyzdy este saqtańyz. Ony telefondaǵy qujattardan bilýge bolady. Osy kod arqyly polıtsııa urlanǵan smartfondy izdeıdi. Uıaly baılanys operatoryna urlyq týraly habarlap, nómirińizdi buǵattańyz», — dedi Іlııas Jumaǵulov.
Polıtsııa mamany bank qyzmetkerlerimen baılanysyp, kartańyzdy qulyptaý qajettigin aıtady. Oǵan qosa poshtańyz ben áleýmettik paraqshalardyń qupııa sózin aýystyrǵan abzal.
«Qoldanǵan uıaly telefondardy satý boıynsha jaqyn mańdaǵy dúńgirshekterdi sholyp shyǵyńyz. Ádette, tájirıbesi az urylar telefonnan tezirek qutylýdyń amalyn izdeıdi. Atalǵan qylmystyń aldyn alý úshin, saqtyq sharalaryn buljytpaı oryndap, qyraǵy bolǵandaryńyz durys», — dep tolyqtyrdy Іlııas Jumaǵulov.
Eske salsaq, budan buryn aıazdy kúnderde qandaı qaýipsizdik erejesin saqtaǵan jón ekendigi jaıynda keńes berildi.
