Uıaly baılanys tarıfi operatorlardyń ınfraqurylymǵa ınvestıtsııa salýynan qymbattap jatyr — Konıashkın

ASTANA. KAZINFORM — Uıaly baılanys tarıfi operatorlardyń ınfraqurylymdy damytýǵa ınvestıtsııa salýyna baılanysty qymbattap jatyr. Bul týraly Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın aıtty. 

— Mınıstrlik tarıfterdiń, onyń ishinde telekom salasynyń retteýshisi sanalady. Osy oraıda birneshe jaıtty aıtqym keledi. Barlyǵymyz kez kelgen damý atalǵan qyzmetti iske asyratyn kompanııalary tarapynan ınvestıtsııalyq shyǵyndardy qajetsinetindigin túsinýimiz qajet. Aıtalyq, 2023 jyldan baılanys operatorlary ınfraqurylymǵa 700 mlrd teńgeden astam ınvestıtsııa saldy. Qazirgi ýaqytta bazalyq stansalardy, onyń ishinde jańa standarttar boıynsha 5G stansalaryn ornatý qarqyndy júrip jatyr, — dedi ol Úkimet otyrysynan keıingi brıfıngte.

Onyń aıtýynsha, jekelegen jaǵdaıda baılanys operatorlary tarıfti arttyrýǵa quqyly.

— Bul rette tarıfti baqylaıtyn ári tıisinshe tekserý júrgizýge múmkindigi bar ókiletti organnyń bar ekenin de atap ótken jón. Osy oraıda biz qyzmetter men ishki toptamalarǵa emes, jalpy salanyń damý draıveri, baılanys sapasynyń artýyna ókiletti memlekettik organ retindemiz. Bul rette biz azamattarymyzǵa sapaly uıaly baılanysty, sapaly ınternetti qamtamasyz etýge tıispiz, — dedi birinshi vıtse-mınıstr.

Osy oraıda ol ózi qoldanatyn mobıldi operatordan tarıftiń artatyndyǵy týraly habarlama almaǵanyn aıtty.

Buǵan deıin elimizdegi uıaly baılanys operatorlary 2026 jyly tarıfter ózgerýi múmkin ekenin málimdegen bolatyn.