Uıaly baılanys operatorlarynyń tarıfti negizsiz kóterý áreketteri qaralyp jatyr
ASTANA. KAZINFORM – Básekelestikti qorǵaý jáne damytý agenttigi uıaly baılanys operatorlarynyń tarıfti jón-josyqsyz kóterýine qatysty pikir bildirdi.
- Qazir agenttik uıaly baılanys operatorlarynyń 2024 jyly jáne 2025 jyldyń basynan bastap básekelestikti qorǵaý salasyndaǵy zańnamanyń buzylýynan baǵanyń ósýine ákeletin is-áreketterdi qarap jatyr. Agenttik operatorlardyń tarıf baǵasyn negizsiz kóterý faktilerin anyqtaǵan kezde tergeý rásimi taǵaıyndalady. Osy oraıda, tarıfterdi kóterýdiń negizi tek tergeý sheńberinde tekserilýi múmkin. Tergeý - básekelestikti qorǵaý salasyndaǵy zańnamany buzýdy rastaıtyn nemese joqqa shyǵaratyn naqty derekterdi jınaýǵa baǵyttalǵan monopolııaǵa qarsy organnyń is-sharasy, - delingen resmı saýal jaýabynda.
Sondaı-aq Básekelestikti qorǵaý jáne damytý agenttigi «Ksell» AQ, (Activ), «Mobaıl Telekom–Servıs» JShS (Tele2/Altel) jáne «Kar-Tel» JShS-ne (Beeline) qatysty buǵan deıin bastalǵan tarıf baǵasyn bir mezgilde kóterý, ıaǵnı básekelestikke qarsy kelisilgen is-qımyl belgileri boıynsha tergeý amaldary atalǵan operatorlardyń sot tártibimen shaǵymdanýyna baılanysty kúshin joıǵanyn málim etti.
- Zań buzýshylyq faktisi Qazaqstan Respýblıkasynyń kásipkerlik kodeksine sáıkes júrgiziletin tergeý qorytyndylary boıynsha ǵana anyqtalýy múmkin, - deıdi agenttikten.
Baılanys operatorlaryna qandaı jaýapkershilik kózdelgen
Qazaqstan Respýblıkasy «Ákimshilik quqyq buzýshylyq týraly» kodeksiniń 159–babyna sáıkes, sýbektilerdiń básekelestikke qarsy kelisilgen is-áreketteri, monopolııalyq jolmen joǵary baǵany belgileý, baǵany ustap ústemdik kórsetý baılanys operatorynyń monopolııalyq kirisin tárkileı otyryp, aıyppulǵa alyp keledi.
Sonymen qatar, atalǵan kodekstiń 226-babynyń 2-tarmaǵyna sáıkes (monopolııaǵa qarsy den qoıý sharalary), norma buzylǵan jaǵdaıda sýbektiler (baılanys operatorlary):
1) monopolııaǵa qarsy organnyń nusqamalaryna sáıkes zań buzýshylyqty toqtatýǵa jáne onyń saldaryn joıýǵa, nusqamada kózdelgen ózge de áreketterdi oryndaýǵa mindetti;
2) keltirilgen zalaldy Qazaqstan Respýblıkasynyń azamattyq zańnamasyna sáıkes óteýge mindetti;
3) Qazaqstan Respýblıkasynyń Ákimshilik quqyq buzýshylyq týraly kodeksinde belgilengen tártippen monopolııaǵa qarsy organnyń ákimshilik jaza qoldaný týraly qaýlysyn oryndaýǵa mindetti.
Eske sala keteıik, byltyr jyl sońynda elimizdegi uıaly baılanys qyzmetiniń qunyna sholý jasaǵan edik.
Aıta ketsek, byltyr qarashadaǵy statıstıka boıynsha elimizde 26 mln uıaly baılanys abonenti tirkelgen.