Uıaly baılanys operatorlary arasynda básekelestik baıqalmaıdy – Oljas Bektenov
ASTANA. KAZINFORM – Uıaly baılanys operatorlary ádetke aınaldyrǵan tarıfter qunyn ulǵaıtý máselesi jeke nazardy talap etedi. Bul týraly Premer-Mınıstr Oljas Bektenov aıtty.
«Biz sapaly ınternettiń barlyq jerde keńinen taralǵany týraly ázirge aýyz toltyryp aıta almaımyz. Jurtshylyq bul máselege únemi shaǵymdanyp keledi. Tek ótken jyldyń ózinde baılanys sapasyna shamamen 21 myń shaǵym kelip tústi. Bıylǵy 5 aıda mundaı shaǵymdar sany 11 myńǵa jýyqtady. Másele tek shalǵaı eldi mekenderde ınternettiń nashar bolýynda ǵana emes. Qalalarda da mobıldi baılanys pen ınternet sıgnalynyń kóńilden shyqpaýy baıqalady», - dedi Premer-Mınıstr.
Sondaı-aq Úkimet basshysy shekara ótkizý pýnktterinde de baılanys pen ınternet sapasy turaqsyz ekenin aıtty. Bul kólikter men adamdar aǵynynyń shekaradan ótýine kedergi keltiredi. Osy másele jedel sheshilýi kerek. Jalpy mınıstrlik operatorlarmen jáne ákimdiktermen birlesip qoldanystaǵy ınfraqurylymdy jańartý qajet.
«Operatorlardyń ádetke aınaldyrǵan tarıfter qunyn ulǵaıtý máselesi jeke nazardy talap etedi. Básekelestikti damytý maqsatynda baılanys qyzmetteriniń tarıfterin memlekettik retteý alyp tastalǵany belgili. Básekelestik qana bas retteýshi bolýǵa tıis. Alaıda, ázirge bul baıqalmaı otyr. Operatorlardyń barlyǵynda baǵalar shamamen birdeı. Budan basqa, Salyq kodeksiniń aıasynda operatorlar úshin radıojıilikti spektrge 90 paıyz mólsherinde jeńildik kózdelgen. Osy rette operatorlar lıtsenzııalyq mindettemelerge sáıkes únemdelgen qarajatty baılanys ınfraqurylymyn damytýǵa ınvestıtsııalaý tıis. Sondyqtan mınıstrlik monopolııaǵa qarsy organmen birlesip, operatorlardyń mindettemelerin tolyqqandy oryndaýyn jáne baǵalyq sózbaılasý men tarıfterdiń negizsiz artýyna jol bermeýdi qamtamasyz etýi qajet», - dedi Oljas Bektenov.
