Úı janýarlarynyń biryńǵaı derekter bazasy iske qosylady - Almaty

ALMATY. QazAqparat – Almatyda úı janýarlary chıpteledi. Chıppen qatar jyl saıyn ıt pen mysyqqa qutyrýǵa qarsy vaktsınatsııa salynady. Bul týraly Almaty qalalyq Kásipkerlik jáne ınvestıtsııalar basqarmasynyń veterınarııa bóliminiń bastyǵy Áıgerim Jaqsylyq málim etti, dep habarlaıdy QazAqparat tilshisi.

Onyń aıtýynsha, aladǵy ýaqytta qalada qańǵybas janýarlardyń máselesin boldyrmaý úshin mıkrochıpter ornatylady. Kóshede olardyń paıda bolýynyń negizgi sebepteri áli de ıtterdi syrtqa bosatý, joǵaltý jáne dalaǵa tastap ketý. Tabylǵan janýarda chıptiń bolýy ony úıge qaıtarýǵa nemese ıesin jaýapqa tartýǵa múmkindik beremek.

Sonymen qatar ol úı janýarlary týraly barlyq derekter PetControl biryńǵaı derekter bazasyna engiziledi. Úı ıtteri men mysyqtaryn sterılızatsııalaý men kastratsııalaý memlekettik baǵdarlamasyn iske asyrý jalǵasady. 2024 jylǵa qaraı Almatyda 28 myń janýar osy protsedýradan ótedi.

«Baǵdarlama úısiz úı janýarlarynyń sanyn gýmanıstik retteýge baǵyttalǵan. Óıtkeni úı janýarlarynyń urpaqtary jyl saıyn qańǵybas janýarlardyń popýlıatsııasyn tolyqtyrady.Sterılızatsııa men kastratsııa baǵdarlamasy jylyna 2 ret, aqpan men tamyzda júrgiziledi», - deıdi spıker.

Osy jyly úı janýarlaryn tegin sterılızatsııalaý jáne kastratsııalaý baǵdarlamasy aıasynda 4 myńǵa jýyq ıt pen mysyq qamtylmaq. Qazirgi ýaqytta memlekettik satyp alý baıqaýy júrip jatyr. Oǵan 51,7 mln teńge kóleminde qarajat bólindi. Baǵdarlamany qyrkúıektiń ortasyna bastaý josparda.

«Almaty qalasynda úı janýarlaryn ustaý men serýendeý erejeleri boıynsha túsindirme jumystaryn erikti janýarlar quqyǵyn qorǵaýshylar júrgizedi. Biraq polıtsııa men veterınarlyq qyzmetkerler janýarlarǵa zorlyq-zombylyq jasaýdyń aldyn alady»,-dedi ol.