Úı janýarlaryn azaptaǵandar qylmystyq jaýapkershilikke tartylady
ASTANA. KAZINFORM – Memleket basshysy «Taza Qazaqstan» bastamasyn damytý aıasynda janýarlarǵa qamqorlyq mádenıetin qalyptastyrýǵa toqtaldy. Bul týraly Aqorda habarlady.
– Úı janýarlarynyń adamdardan qorlyq kórýine jol bermeý kerek. Úkimet úı janýarlaryn durys kútip-baptamaǵandarǵa beriletin ákimshilik jaýapkershilikti qatańdatyp, al olarǵa qatygezdik kórsetkenderge kesiletin qylmystyq jazany kúsheıtýi kerek. Negizi, qańǵybas ıtter problemasyna azamattardyń nemquraılylyǵy sebep: ıaǵnı olar bastapqyda janýarlarǵa yqylasy aýyp asyraǵanymen, keıinnen kóńilderi qalyp, kereksiz zattaı kóshege tastap ketip jatady. Mundaı keleńsizdikterdiń aldyn alý qajet. Sondaı-aq eshqandaı «haıpqa» jol bermeı, mamandandyrylǵan janýarlar ortalyqtarynyń qyzmetine qoǵamdyq baqylaý qoıǵan jón. Bul iske sizder de úles qosasyzdar dep oılaımyn. Jalpy, qańǵybas ıtterge qamqorlyqpen qaraý qoǵamnyń arasyna syna qaqpaýǵa tıis. Óńirlerden alǵan aqparatqa sáıkes, balalar, tipti, eresekter jabaıy ıtterden jıi zardap shegip jatyr. Basty másele – osy. Sondyqtan bul problemaǵa memleket pen jurtshylyqtyń, naqty aıtqanda, zań shyǵarý turǵysynan Parlamenttiń aralaspasyna bolmaıdy. Biraq biz qorǵansyz janýarlardy jábirlegen faktilerge de beıjaı qaramaýymyz kerek, atap aıtqanda, úı janýarlaryn azaptaǵandardy qylmystyq jaýapkershilikke tartqan durys. Osyndaı tásilder qorshaǵan ortaǵa ozyq ári jaýapty kózqaras qalyptastyrady dep oılaımyn. Bul da «Taza Qazaqstan» aıasynda atqarylýǵa tıis istiń biri, – dedi Prezıdent.
Qasym-Jomart Toqaev elimizde aýqymdy jumys atqarylyp jatqanyn jetkizdi.
