Úı janyndaǵy dúkender saýda ústemesi talabyn qalaı oryndap otyr
ASTANA. KAZINFORM — Taýarlarǵa belgilengen shekti ústeme baǵany asyryp qoıǵany úshin ótken jyly kóshe boıyndaǵy jáne úı janyndaǵy dúkenderge 4,3 myń ákimshilik qaýly shyǵaryldy. Bul týraly Saýda jáne ıntegratsııa mınıstrliginen málim etti.
- Qazaqstan Respýblıkasynyń saýda qyzmetin retteý týraly zańnamasynyń saqtalýyna memlekettik baqylaýdy júzege asyrý aıasynda mınıstrliktiń aýmaqtyq departamentteri elimizdiń zańnamasyna sáıkes turaqty negizde tekserýler júrgizedi. «Ákimshilik quqyq buzýshylyq týraly» kodeksiniń 204-4 babyna sáıkes, ishki saýda sýbektisiniń áleýmettik mańyzy bar azyq-túlik taýarlaryna (ÁMAT) saýda qyzmetin retteý týraly zańnamasynda belgilengen saýda ústemesiniń mólsherin arttyrýy eskertý jasaýǵa alyp keledi. Ákimshilik jaza qoldanylǵannan keıin, bir jyl ishinde qaıtalap jasalǵan is-áreket – shaǵyn kásipkerlik sýbektilerine – 10, orta kásipkerlik sýbektilerine – 75, iri kásipkerlik sýbektilerine 300 aılyq eseptik kórsetkish mólsherinde aıyppul salýǵa alyp keledi, - delingen mınıstrliktiń Kazinform agenttigine bergen jaýabynda.
Máselen, 2024 jyly mınıstrliktiń aýmaqtyq departamentteri ÁMAT-qa saýda ústemesiniń mólsherin asyrǵany úshin 4 384 ákimshilik qaýly shyǵardy, onyń ishinde 16,8 mln teńge somasyna 284 aıyppul salyndy jáne 4 100 eskertý berildi. Al 2023 jyly ÁMAT-qa saýda mólsherin asyrǵany úshin 760 ákimshilik qaýly shyǵarylsa, onyń ishinde 6 mln teńge somasyna 51 aıyppul men 709 eskertý boldy.
- Artyq deldaldardy boldyrmaý, sondaı-aq ÁMAT baǵasynyń ósýin tejeý maqsatynda azyq-túlik taýarlaryna baǵa belgileýdiń búkil tizbegi boıynsha deldaldyq shemalardy tergeý jónindegi óńirlik komıssııalar jumys isteıdi. Óńirlik komıssııalardyń maqsaty – ónimsiz deldaldardy anyqtaý jáne olarǵa tyıym salý, áleýmettik mańyzy bar azyq-túlik taýarlaryn satý kezinde saýda ústemesiniń mólsherin asyra baǵalaýdy anyqtaý. Memlekettik baqylaý fýnktsııasy Saýda jáne ıntegratsııa mınıstrligine berilgen sátten bastap óńirlik komıssııalardyń qyzmeti fıskaldyq jáne basqa da organdardy tarta otyryp kúsheıtildi (BQDA, QMA, QM MKK). 2024 jyly 1,4 myńnan astam otyrys ótkizildi, 4,4 myńnan astam ónimsiz deldal anyqtalyp, ishki saýda sýbektilerine qatysty ákimshilik ister qozǵaldy (2023 jyly - 1 059 ákimshilik is, 2022 jyly - 310 ákimshilik is), - dep atalyp ótken vedomstvo aqparatynda.
Atap aıtqanda, bıyl jyl basynan bastap jergilikti atqarýshy organdar óńirlik komıssııalarynyń 153 otyrysy ótkizilip, 530 ónimsiz deldal jáne saýda ústemesiniń asyp ketý faktileri anyqtaldy (506 ákimshilik hattama toltyryldy, 24 deldalǵa tyıym salyndy). Komıssııa jumysynyń nátıjesinde áleýmettik mańyzy bar azyq-túlik taýarlaryn satatyn deldaldar joıylady jáne sórelerdegi baǵalar 5-ten 15%-ǵa deıin tómendetiledi.
Buǵan deıin úı janyndaǵy dúkender men áleýmettik taýar satýshylar úshin QQS óspeıtinin jazǵan edik.