Úıi tarlyq etken qyzylordalyq kópbalaly ana sotta jeńip shyqty
QYZYLORDA. KAZINFORM — Qyzylorda oblysynyń mamandandyrylǵan aýdanaralyq ákimshilik soty kópbalaly ananyń turǵyn úı quqyǵyn qorǵady.
2024 jyly Qyzylorda qalasynyń turǵynyna jetim jáne ata-anasynyń qamqorlyǵynsyz qalǵan balalar sanaty boıynsha esepte turǵany úshin memlekettik turǵyn úı qorynan páter berilgen.
— Talap qoıýshy jalǵyzbasty ana retinde kámeletke tolmaǵan 4 balasymen birge sol úıge qonystanǵan. Alaıda, berilgen turǵyn úıdiń naqty alańy bes adamnan turatyn otbasy úshin Turǵyn úı qatynastary týraly zań normalaryna sáıkes kelmeıtini anyqtalǵan. Osyǵan baılanysty talap qoıýshy ýákiletti organǵa belgilengen norma boıynsha basqa turǵyn úı berý týraly ótinishpen júgingen. Alaıda onyń ótinishi qanaǵattandyrylmaǵan. Talap qoıýshy ýákiletti organdardyń sheshimderin zańsyz dep tanýdy talap etken. Sot kópbalaly otbasyǵa berilgen turǵyn úıdiń zańnamada belgilengen normalarǵa sáıkes kelmeıtinin anyqtady. Sot sheshimimen talap aryz qanaǵattandyrylyp, ýákiletti organdardyń talap qoıýshyǵa qatysty sheshimi men qaýlysynyń kúshi joıyldy, — delingen sot habarlamasynda.
Ýákiletti organdar talap qoıýshynyń buzylǵan quqyǵyn qalpyna keltirýge mindetteldi.
Buǵan deıin biz Qyzylorda oblystyq prokýratýrasy alıment tóleýden qasaqana jaltarǵan boryshkerlerge qatysty Qylmystyq kodekstiń 139-babymen 32 qylmystyq isti tirkegenin jazdyq.
