Úı sýyq, tońyp otyrmyz: Oralda turǵyndar jylýdyń joqtyǵyn aıtyp, shaǵymdandy

ORAL. KAZINFORM — Oral qalasynda jylý 7 qazannan beri berile bastaǵanmen, turǵyndardan shaǵym áli túsip jatyr.

Instagram áleýmettik jelisinde A.Skorobogatov kóshesi 67-úıde turatyn turǵyndar jylý durys qosylmaǵanyn jazǵan.

— Alǵashqy kúnderi jylý tek eki bólmede boldy, sodan keıin bári sýyp ketti. «Jaıyqjylýqýat» AQ-ǵa habarlassaq, páter ıeleri kooperatıvine júginý qajet deıdi. PIK-taǵylar aıqaıdan basqa eshteńeni bilmeıdi. Bastyqtary oryndarynda bolmaıdy. Jylý aqysyn biz 7 qazannan bastap tońǵan kúnderimiz úshin tóleıtin bolamyz. Bul biraq eshbir uıymdy alańdatpaı otyr, — deıdi turǵyn.

Osy máselege oraı Kazinform tilshisiniń saýalyna «Jaıyqjylýqýat» AQ bas dırektorynyń mindetin atqarýshy Bekbolat Qameshov jaýap berdi.

Onyń sózine qaraǵanda, atalǵan úıge «Tsentr» PIK-i qyzmet kórsetedi. 

— «Tsentr» PIK jylý júıesin synaqtan ótkizgen joq. Sol sebepti daıyndyq qujatyn almady. Biz óz tarapymyzdan jylýdy berdik. Іshki júıeni qosýǵa PIK jaýap beredi. A.Skorobogatov kóshesi 67-úıdiń tusymen ótetin jylý trassasyna taǵy eki úı (Skorobogatov kóshesi 67/2, Muhıt 124) qosylǵan. Olarda mundaı problema joq, — dedi B.Qameshov.

Áleýmettik jelidegi aqparatqa qaraǵanda, turǵyndar Ábilqaıyr han dańǵyly 2/2, Kókshetaý kóshesi 90 jáne basqa mekenjaılarda jylý joqtyǵyn habarlap jatyr.

Oral qalasy ákimdiginen alynǵan málimet boıynsha shaharda H.Chýrın kóshesi 119 jáne Jáńgir han kóshesi 15-úı ǵana jylýǵa qosylmaǵan. Munyń sebebi — bul úılerde basqarý nysany joq. Qazirgi kezde jertólelerde qubyr aýystyrý jumystary júrgizilýde.

— Al ózge keıbir úılerde jylý máselesi týyndasa, bul ishki júıege baılanysty. Muny basqarý nysanymen birlese otyryp sheshý qajet, — delingen ákimdik jaýabynda.

Eske sala keteıik, budan buryn Oral qalasynda jylý qubyrlary nege jabylmaǵanyn jazǵan edik.