Úıi sýdyń astynda qalǵan 130 otbasyna jańa baspana berildi
ASTANA. KAZINFORM - Sý tasqynynan keıin 20 myńnan astam qazaqstandyq otbasy memlekettik qoldaýǵa ıe bolǵan. Bul jaıynda Úkimettiń baspasóz qyzmetinen habarlandy.
QR Úkimeti Memleket basshysy Qasym-Jomart Toqaevtyń tapsyrmasy boıynsha bıylǵy kóktemde sý tasqynynan zardap shekken azamattarǵa keltirilgen zalaldy óteý jumysyn jalǵastyryp jatyr.
Búgingi tańda 20 601 otbasy 7,4 mlrd teńgeden astam somaǵa 100 AEK (369 200 teńge) mólsherinde birjolǵy tólem aldy.
Mal shyǵyny úshin berilgen memlekettik kómek kólemi 1,1 mlrd teńgeden asty.
11 mamyrdaǵy jaǵdaı boıynsha 130 otbasy eski úıiniń ornyna jańa baspanaǵa ıe boldy.
Bul rette Aqtóbe, Qostanaı, Soltústik Qazaqstan jáne Pavlodar oblystarynda zardap shekken azamattarǵa beriletin 239 jańa úı salynyp jatyr.
Sonymen qatar 568 otbasy 710 mln teńgeden astam somaǵa úıin jóndeýge jáne qalpyna keltirýge ótemaqy aldy.
Jalpy alǵanda zardap shekken óńirlerde 9995 turǵyn úı tekserilip, 7522 nysanda baǵalaý jumystary júrgizildi.
Zalaldy óteý jumystary jalǵasyp jatyr jáne Úkimettiń qatań baqylaýyna alynǵan.
QR Prezıdentiniń tapsyrmasy boıynsha barlyq zardap shekken azamattarǵa jan-jaqty kómek pen qoldaý kórsetiledi.
