Úı ishin «jylyjaıǵa» aınaldyrǵan: Jetisýda esirtki ósirgender ustaldy
ASTANA. KAZINFORM — Jetisý oblysynda polıtseıler úıdegi «jasyryn jylyjaıdy» anyqtady.
«Qarasora — 2026» jedel-profılaktıkalyq is-sharasy aıasynda Aqsý aýdanynyń polıtsııa qyzmetkerleri UQK-niń aýdandyq bólimshesimen birlesip, jeke turǵyn úıde esirtki ósimdikterin zańsyz ósirý jáne saqtaý faktisiniń jolyn kesti.
Jedel-tergeý is-sharalary barysynda Jansúgirov aýylyndaǵy úılerdiń birinde tintý júrgizilip, esirtki quramdy ósimdikterdi ósirýge arnaıy jabdyqtalǵan birneshe bólme anyqtaldy.
Bólmelerde ósimdikter otyrǵyzylǵan qumyralar, sondaı-aq jasandy jaryqtandyrý júıesi ornatylǵan, shaǵyn jylyjaı retinde jabdyqtalǵan arnaıy shatyr bolǵan.
— Tintý barysynda jalpy salmaǵy 5 keliden asatyn 28 túp kannabıs, 720 gramm jańadan jınalǵan jáne 762 gramm keptirilgen marıhýana tárkilendi. Tergeý barysynda Aqsý aýdanynyń 60 jáne 64 jastaǵy eki turǵyny anyqtaldy. Qazir ekeýi de qamaýda otyr, — delingen habarlamada.
Atalǵan derek boıynsha ósirýge tyıym salynǵan, quramynda esirtki zattary bar ósimdikterdi zańsyz ósirý faktisimen sotqa deıingi tergep-tekserý júrgizilip jatyr. Oqıǵanyń barlyq mán-jaıy anyqtalady.
Buǵan deıin Shymkentte esirtki saıttaryn jarnamalaǵan kúdikti ustalǵanyn jazǵanbyz.
