Úı sharýashylyqtarynyń 9 paıyzy ózderin tómen tabysty topqa, 87,4 paıyzy ortasha tabysty topqa jatqyzǵan
ASTANA. 23 qazan. QazAqparat - QR Statıstıka agenttigimen aǵymdaǵy jyldyń tamyz aıynda 12 myń úı sharýashylyqtarynyń sýbektıvti baǵalaýy bazasynda Qazaqstandaǵy halyqtyń turmys sapasyna birjolǵy zertteý júrgizildi. Suraýǵa úı sharýashylyqtarynyń basshylary qatysty.
Bul týraly agenttiktiń baspasóz qyzmetinen habarlandy.
Statıstıka agenttiginiń habarlamasyna qaraǵanda, zertteý quraly bolyp úı sharýashylyqtarynyń úsh tabys deńgeıi boıynsha mynalar anyqtaldy:
- tabystyń tómen deńgeıi (tipti tamaqqa da jetpeıdi; tamaqqa jetedi, biraq biz kıim satyp alý, páter aqy tóleýde qıyndyq kóremiz);
- tabystyń ortasha deńgeıi (tamaqqa jáne kıimge jetedi, biraq bizdiń uzaq ýaqyt paıdalanatyn taýarlardy satyp alýǵa múmkindigimiz joq; tamaqqa, kıimge jáne uzaq ýaqyt paıdalanatyn taýarlarǵa jetedi, biraq mashına, páter, saıajaı jáne taǵy basqa satyp alýǵa múmkindigimiz joq);
- tabystyń joǵary deńgeıi (barlyq qajettini satyp alýǵa jetkilikti).
Zertteý qorytyndylary boıynsha úı sharýashylyqtarynyń 9 paıyzy ózderin tómen tabysty topqa jatqyzdy, al respondentterdiń kóp bóligi ózderin (87,4 paıyz) ortasha tabysty topty qurady jáne tek 3,6 paıyz úı sharýashylyqtarynyń basshylary ózderiniń ál-aýqattaryn joǵary dep baǵalaǵan. Bul rette atalǵan kórsetkishterdi 2011 jyly ótkizilgen zertteý qorytyndylarymen salystyra kele, agenttik úı sharýashylyqtaryn tabys deńgeıi boıynsha bólý barysynda tómen tabysty toptan edáýir joǵary tabysty topqa yǵysýyn atap ótedi.
«Úı sharýashylyqtary kúnkóristeriniń negizgi qarajat kózderi jaldamaly jumystan (83,1 paıyz), zeınetaqy (29,3 paıyz), jeke qosalqy sharýashylyqtan alynǵan ónimderdi tutynýdan (26,7 paıyz) túsken tabystar boldy. Alaıda, olarmen qatar 13-15 paıyz sheńberinde qubyla otyryp, sondaı-aq memlekettik járdemaqylar, týysqandardyń, tanystardyń kómegi jáne óz betinshe jumyspen qamtylý baıqaldy. Sonymen qatar, óz betinshe jumyspen qamtylýdan túsken tabys edáýir joǵary deńgeıli tabysty (30,1 paıyz) úı sharýashylyqtaryna, al jaldamaly jumystan túsken tabys ortasha deńgeıli tabysty (82,1-87,4 paıyz) úı sharýashylyqtaryna tán ekendigin atap ótý qajet. Tabystyń joǵary deńgeıi osy toptaǵy úı sharýashylyqtarynyń jartysyna jýyǵyna (47,2 paıyz) jınaq aqshalarynyń bolýyna múmkindik beredi, bul rette osyndaı jınaq aqshalary bar úı sharýashylyqtarynyń 12,6 paıyzy úshin tabystyń joq bolǵan jaǵdaıynda jáne qazirgideı ómir súrý jaǵdaıyn saqtaı otyryp 3 jáne odan da kóp jyl ómir súrýge múmkindik beredi. Alaıda, eger tómen tabysty úı sharýashylyqtarymen salystyratyn bolsaq, olardyń arasynda jınaq aqsha jasaýǵa tek 13,8 paıyzynyń múmkindigi bar, olardyń 76,9 paıyzy tabys joq kezeńde oǵan bir aı ǵana ómir súre alady», - delingen baspasóz habarlamasynda.
Budan bólek, úı sharýashylyqtarynyń 40 paıyzynan astamy ómir súrý jaǵdaıyn ózderiniń baǵalaýy boıynsha jaqsy dep belgilegen.
