Úı sharýashylyǵynyń tutyný shyǵystaryn zertteýdi qamtý - ózekti másele
ASTANA. 2 sáýir. QazAqparat - Úı sharýashylyǵynyń tutyný shyǵystaryn zertteýdi qamtý úlken problemalyq másele bolyp otyr.
Búgin QR Parlamenti Májilisinde Qazaqstan Respýblıkasy memlekettik statıstıkasynyń damýy, 2011 jyldyń qorytyndylary jáne 2012 jylǵy josparlaryna ótken Úkimet saǵatynda depýtat Seıitsultan Áıimbetov osylaı málim etti.
«Bizge belgili bolǵandaı, Agenttik respýblıkanyń búkil aýmaǵynda ortasha statıstıkalyq úı sharýashylyǵynda tutynylatyn taýarlar men qyzmetter kórsetý jıyntyǵynyń 508 pozıtsııasy boıynsha zertteý júrgizýde. Bul rette taýarlar satý boıynsha tańdaý kólemi - 39 paıyzdy, al aqyly qyzmetter kórsetý boıynsha bar bolǵany 11 paıyzdy quraıdy», - deıdi depýtat. Onyń aıtýynsha, úı sharýashylyǵynyń tutyný shyǵystaryn zertteýdi qamtý úlken problemalyq másele bolyp otyr.
«Búgingi tańda bizde bar 4 mln. 300 myń sharýashylyqtyń 12 myń sharýashylyǵynda ǵana zertteý júrgizilýde, ıaǵnı zertteý tek qana 0,28 paıyzdy qamtıdy. Sondyqtan, bizde barlyq osy kórsetkishterdi esepteý ádistemesin jaqsartý týraly Agenttikke tilegimiz bar. Sondaı-aq, esepteletin baǵa ındeksiniń statıstıkalyq dáldigi usynylatyn aqparattyń sapasyna edáýir dárejede baılanysty bolady», - deıdi S. Áıimbetov.
