Úı salýǵa berilgen jer ýchaskeleriniń 57 paıyzy 5 jyldan astam ýaqyt boıy bos jatyr - Q. Otarov
ASTANA. 28 aqpan. QazAqparat -Jeke turǵyn úı qurylysy úshin berilip, keıinnen ıgerilmeı jatqan jer ýchaskeleriniń 57 paıyzy 5 jyldan astam ýaqyt boıy bos jatyr. Bul týraly búgin Májiliste «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Óńirlik damý mınıstrligi Jer resýrstaryn basqarý komıtetiniń tóraǵasy Qadyrhan Otarov málim etti.
Komıtet tóraǵasynyń aıtýynsha, byltyrǵy jyly Elbasynyń tapsyrmasyna sáıkes, jeke turǵyn úı qurylystaryna usynylǵan jer ýchaskelerin túgendeý júrgizilgen. «Jerdi túgendeý nátıjesinde 44 myńǵa tarta paıdalanylmaı turǵan ýchaskeler nemese zańnamany buza otyryp paıdalaný faktileri anyqtaldy. Bul zerttelgen jer ýchaskeleriniń 20 paıyzyn quraıdy. Al ıgerilmegen jer ýchaskelerin taldaý barysynda olardyń 57 paıyzy 5 jyl boıy paıdalanylmaı kelgenin, bos jatqanyn kórsetti. Jer ýchaskelerin ıgermeýdiń basty sebebi olarda tıisti ınjenerlik ınfraqurylymdarmen jabdyqtalyp, jeke turǵyn úı qurylysyna daıarlanbaýynan bolyp tabylady», - deıdi Q. Otarov.
Onyń aıtýynsha, 14 myńǵa tarta jer ýchaskesi turǵyn úı qurylysyn salatyn aýmaqta sýmen qamtamasyz etý nysandarynyń, elektr energııasynyń, joldardyń joqtyǵynan paıdalanylmasa, jer ýchaskeleriniń 30 myńnan astamy sol azamattardyń óz kinásinen ıgerilmeı otyr.
