«Úı salý úshin de úkimetke qaraılaımyz» - baspasózge sholý
Keshe Aqordada Qazaqstan Respýblıkasynyń Prezıdenti Nursultan Nazarbaev elimizge memlekettik saparmen kelgen Koreıa Respýblıkasynyń Prezıdenti Pak Kyn Hemen kezdesti, dep habarlaıdy "Egemen Qazaqstan" basylymy "Qazaqstan - Koreıa: Strategııalyq áriptestiktiń jańa kezeńi" atty maqalada.
Gazettiń atap kórsetýinshe, Qazaqstan basshysynyń shaqyrýyna oraı jasalǵan bul sapar joǵary deńgeıdegi baılanystardy nyǵaıtýǵa, saýda-ekonomıkalyq jáne ınvestıtsııalyq-tehnologııalyq yntymaqtastyq aıasyn keńeıtýge, sondaı-aq, Qazaqstan men Ońtústik Koreıanyń strategııalyq seriktestigin damytýǵa baǵyttalǵan.
"Koreıa basshysyn qarsy alýdyń barlyq resmı sharalary atqarylǵan soń Qazaqstan Respýblıkasynyń Prezıdenti Nursultan Nazarbaev pen Koreıa Respýblıkasynyń Prezıdenti Pak Kyn He shaǵyn quramda kezdesip, baılanystardy joǵary deńgeıde nyǵaıtýdyń, saýda-ekonomıkalyq jáne ınvestıtsııalyq-tehnologııalyq yntymaqtastyqtyń, sondaı-aq, Qazaqstan men Ońtústik Koreıa strategııalyq seriktestiginiń negizgi baǵyttaryn talqylady. Taraptar halyqaralyq kún tártibindegi ózekti taqyryptar jóninde de pikir almasyp, halyqaralyq jáne óńirlik uıymdar aıasyndaǵy ekijaqty is-qımyldyń negizgi máseleleri boıynsha ustanymdaryn salystyrdy", - delinedi maqalada.
Al "Aıqyn" basylymynyń búgingi sanynda dárigerlerdiń zańdy belden basyp, jemqorlyqqa belsheden batýyna qatysty "Kim aıtty saǵan, dáriger "jemeıdi" dep?" atty taqyryppen tolymdy materıal usynylyp otyr.
"Bizdiń túsinigimizde, dárigerler búginge deıin adam janyna arasha túsip kúresip kelse, endigide sol aq halattylardyń ózimen kúresýge týra kelip tur. Óıtkeni jyl ótken saıyn densaýlyq salasyndaǵy jemqorlyq beleń alyp barady", - delingen maqalada. - Aıtalyq, 2012 jyly sybaılastyqqa shyrmalyp, senip tapsyrǵan memleket múlkin talan-tarajǵa ushyratqan medıtsına qyzmetkerlerine qatysty 56 is qozǵalsa, 2013 jyly ol 94-ke deıin ósip ketken. Al bıylǵy bes aıdyń ózinde qarjy polıtsııasy 15 qylmystyq is ashyp otyr. Sońǵy jyldary halyq ortasynda da saladaǵy salǵyrttyqqa baılanysty narazylyq kóbeıgendikten, «Nur Otan» partııasynyń Sybaılas jemqorlyqqa qarsy is-áreket jónindegi qoǵamdyq keńes keshe Astanada ózekti taqyrypty arnaıy talqylady".
Aýyldaǵy jastarǵa jer berip, úı salýǵa jaǵdaı jasaý kerek, áıtpese, olar shabadanyn alady da, Astanaǵa tartady! Keshe senatorlar Úkimet ókilderine osyndaı qyzyqty eskertý jasady, dep jazady "Aıqyn" "Úı salý úshin de úkimetke qaraılaımyz" atty taǵy bir maqalasynda.
Senat keshe «Qazaqstannyń keıbir zańnamalyq aktilerine memlekettik basqarý máseleleri boıynsha ózgerister men tolyqtyrýlar engizý týraly» zańnyń jobasyn qarady. Talqylaý nátıjesinde qujatqa óz túzetýlerin qosyp, Májiliske qaıtardy. Óıtkeni, oǵan qatysty birqatar suraqtar qaldy. Máselen, senator Qojahmet Baımahanov aýyldaǵy jeke turǵyn úı qurylysy máselesin kóterdi.
Q.Baımahanovtyń málimetinshe, aýylda jeke úı salý úshin «keminde mıllıon teńge aqsha ketedi»: «Naqty Qyzylordany alsaq, Ereke, ózińizge de qatysy bar óńir ǵoı, úıdi bir adam - qamystan, basqasy saz-kesekten salady. Myna zańda olarǵa qatysty eshteńe joq. Jeke úıdi ózi salam degen adamdarǵa jeńildik qarastyrsańyzdar degen ótinishim bar» dedi ol Ekonomıka mınıstri E.Dosaevqa.
Senator ásirese, aýylda turatyndardyń balalary kóp bolyp keletindigine nazar aýdardy: «Ońtústikte bir otbasynda 7-8 bala bar, onyń 3-4-eýi ul bolady da, keıin úılenedi, olar bólek shyǵýy kerek. Endi jeke otaý quryp, úı salaıyn dese, jer ýchaskesin ala almaıdy. Solaı sendelgenderi qansha! Sýy, jaryǵy, ınjenerlik jelileri tartylmaǵan dep bos jatqan jerlerdi bermeıdi. Bulardyń bári qajet, biraq aryq naýasyn tartý talaby nege kerek? Men sony túsinbeımin. Ótkende bir aýylǵa bardym, sol naýalardyń barlyǵyn salyp qoıǵan, erteń ol jerde qurylys júrgende, mashına, traktor qatynaıdy emes pe? Kósheniń boıyndaǵy aryqtar tas-talqany shyǵyp, solaı buzylyp jatyr» degen ol osy talapty qaıta qaraýdy usyndy.
