Úı mańyndaǵy tegin turaq, samokat pen shlagbaým: Almatyda jańa erejeler engizilmek
ALMATY. KAZINFORM — Almatyda avtoturaq, samokat jáne shlagbaýmdardy ornatý máselelerine qatysty jańa qaǵıdalar engizilýi múmkin.
Ashyq NQA portalynda «Jol júrisi qaǵıdalarymen rettelmegen bóliginde Almaty qalasynda jol qozǵalysyn uıymdastyrý qaǵıdalaryn bekitý týraly» joba usynyldy. Ázirleýshi memlekettik organ — Almaty qalasy Jol qozǵalysy jáne jolaýshylar kóligin uıymdastyrý basqarmasy.
Qujatta kommýnaldyq jáne jekemenshik turaqtardy qosa alǵanda, turaq oryndaryn uıymdastyrý jáne olardyń jumys isteý tártibin belgileıtini kórsetilgen. Mańyzdy tusy — almatylyqtarǵa turǵylyqty jerinen 500 metr radıýsta avtoturaqtar orny tegin paıdalanýǵa berilmek. Sondaı-aq qujat turaq oryndary boıynsha tólem jasaý, jeńildik beriletin sanattar máselelerin retteıdi.
Odan bólek atalǵan joba mindetteri:
— Kólik quraldaryn jetkizý (evakýatsııalaý), olardy ýaqytsha saqtaý jáne qaıtarý tártibi aıqyndalyp, arnaýly turaqtarǵa qoıylatyn talaptar engiziledi.
— Samokattardy ornalastyrý jáne paıdalaný máselelerine, onyń ishinde olardyń turaqqa qoıylý tártibi men operatorlarmen ózara is-qımyl jasaý tártibine erekshe nazar aýdarylǵan.
— Shlagbaýmdardy ornatý máselelerin, avtomattandyrylǵan baqylaý júıelerin engizýdi jáne jol júrisi qaýipsizdigin arttyrýǵa ári qalanyń kólik ınfraqurylymyn basqarý tıimdiligin qamtamasyz etýge baǵyttalǵan zııatkerlik kólik júıesin damytýdy retteıdi.
Jobada ony qabyldaý áleýmettik-ekonomıkalyq, quqyqtyq jáne ózge de teris saldarlarǵa ákep soqpaıtyny, sondaı-aq ulttyq qaýipsizdikti qamtamasyz etýge áser etpeıtini jazylǵan.
— Jobanyń maqsaty — qoldanystaǵy Jol júrisi qaǵıdalarymen rettelmegen bóliginde Almaty qalasynda jol qozǵalysyn uıymdastyrýdy keshendi quqyqtyq retteýdi qamtamasyz etý, onyń ishinde turaq oryndarynyń keńistigin retke keltirý, turaqtardyń ashyqtyǵy men qoljetimdiligin qamtamasyz etý, kólik quraldary men jeke mobıldilik quraldaryna arnalǵan ınfraqurylymdy damytý, jol júrisi qaýipsizdigin arttyrý, sondaı-aq basqarý tıimdiligin arttyrý jáne kóshe-jol jelisine túsetin júktemeni azaıtý, — delingen qujatta.
Joba 10 maýsym talqylaýǵa shyǵarylǵan jáne talqylaý 25 maýsymǵa deıin jalǵasady.
Eske salaıyq, buǵan deıin ár almatylyq júrgizýshige tegin turaq orny berilýi múmkin ekenin jazǵanbyz.
