Úı qustary arasynda qus tumaýy tirkelgen joq - komıtet

ASTANA. QazAqparat - Búgingi tańda respýblıkada úı qustary arasyndaǵy qus tumaýy boıynsha epızootııalyq jaǵdaı turaqty. Bul jaıynda Veterınarııalyq baqylaý jáne qadaǵalaý komıteti málimdedi.

Aıta keteıik, 2022 jyly Qazaqstan aýmaǵynda 14 930 180 úı qusyna joǵary patogendi qus tumaýyna qarsy vaktsına jasaý josparlanǵan.

12 aıda 14 764 980 qusqa ekpe egildi (bul - jyldyq jospardyń 99%).

Úı qustarynyń arasynda aýrý belgileri baıqalmaıdy.

Aýmaqtyq ınspektsııalar epızootııalyq jaǵdaıdy baqylaýǵa aldy.

Eske sala keteıik, Aqtaý qalasynan 20 shaqyrym jerde, Qarakól kóliniń jaǵasynda aqqýlar jappaı qyrylǵan bolatyn.

Keshe Veterınarııalyq baqylaý jáne qadaǵalaý komıteti Mańǵystaý oblysynda aqqýlardyń qyrylýyna qus tumaýy sebep bolǵanyn málimdedi.

Osyǵan baılanysty qus tumaýyna qarsy vaktsınanyń 18,6 myń dozasy Mańǵystaý oblysyna jiberildi.