Úı qısaımaǵan: Almatydaǵy 9 qabatty úıdiń ahýaly jaıly ákimdik jaýaby
ALMATY. QazAqparat – Almaty ákimdigi Zerdeli shaǵynaýdanyndaǵy 9 qabatty №1/179 úıdiń ahýalyn teksergen komıssııanyń qorytyndysyn shyǵardy, dep habarlaıdy QazAqparat tilshisi.
Qalalyq TJD kezekshi bólimine búgin turǵyn habarlasyp úıdiń qısaıyp bara jatqanyn aıtyp dabyl qaqqan edi.
Turǵyndardyń shaǵymyn tekserý úshin ákimdik shuǵyl jumys komıssııasyn jınaǵan bolatyn.
«Jeltoqsannyń 10-nan 11-ine qaraǵan túni qalalyq Yńǵaıly orta basqarmasynyń mamandary oqıǵa ornyna shyqqan bolatyn. Vızýaldy tekserý barysynda qatty aýytqý baıqalmaǵan. Búgin «Almatybasjospary» Ǵylymı zertteý ınstıtýtynyń mamandary munyń aldynda qoıylǵan belgilerdi tekserip shyqty. Nátıjesinde eshbir aýytqý baıqalmady», – dedi basqarmadan.
Zerdeli aýdanyndaǵy 9-qabatty úı osydan birneshe jyl buryn irgesi sógilip, bir qyryna qısaıyp qalǵan bolatyn. Sol kezde quzyrly organdardan shuǵyl shtab qurylyp, úıdiń irgesi bekitilip, kúsheıtilgen edi.
Sodan beri arnaıy qurylǵan jumys toby bul nysandy únemi baqylaýda ustap keledi.
Jumys toby qoıylǵan belgilerdi aı saıyn tekserip otyrady. Sońǵy ret belgi 12 qarashada qoıylǵan.
«Qazaq Qurylys jáne sáýlet ǵylymı zertteý jáne jobalaý ınstıtýty» aktsıonerlik qoǵamy mamandary úıdiń aınalasyndaǵy topyraqty zerttegen soń irgetasy kúsheıtiletin bolady.
