Úı kezeginde turǵan 1 myńǵa jýyq qaraǵandylyq bıyl baspana alady

QARAǴANDY. QazAqparat – Bıyl Qaraǵandy oblysynda úı kezeginde turǵan 1 myńǵa jýyq adam baspanaly bolady. Olardyń ishinde 200 kópbalaly ana bar. Sondaı-aq jeke qurylys úshin jer telimderi daıyndalyp jatyr, dep habarlaıdy QazAqparat tilshisi.

Óńirlik kommýnıkatsııalar qyzmeti alańynda ótken brıfıngide Qurylys, sáýlet jáne qala qurylysy basqarmasynyń basshysy Qaırat Qamzın turǵyn úı qurylysynyń qarqyny týraly aıtyp berdi.

Oblysta «Nurly jer» memlekettik baǵdarlamasy aıasynda baspana qurylysy birneshe baǵytta júrip jatyr. Olar – halyqtyń áleýmettik osal toptary úshin arendalyq páterler jáne nesıege beriletin turǵyn úıler.

«Satyp alý quqyǵynsyz páterler Qaraǵandy, Prıozersk, Saran, Temirtaý, Shahtınsk qalalarynda, sondaı-aq Abaı, Aqtoǵaı, Buqar Jyraý, Qarqaraly, Nura, Osakarov jáne Shet aýdandarynda salynady.

Jańa turǵyn úı salýdan basqa, oblysta bos turǵan úılerdi qalpyna keltirý tájirıbesi qoldanylady. Qazir Doskeı aýylynda, Shashýbaı kentinde jáne Aqtoǵaı aýdanynda úıler qalpyna keltirilip jatyr», - dep habarlady Qaırat Qamzın.

Onyń aıtýynsha, jyl sońyna deıin nesıelik 4 úı (úsheýi Qaraǵandyda jáne bireýi Temirtaýda) paıdalanýǵa beriledi. Mundaı turǵyn úıler Balqash pen Shahtınsk qalalarynda da salynýda.

Jeti aıda oblysta 254,8 myń sharshy metr turǵyn úı paıdalanýǵa berildi. Bul 2021 jyldyń sáıkes kezeńimen salystyrǵanda 8,1% kóp.

Basqarma basshysynyń málimetinshe, 1 200 jer ýchaskesi ınfraqurylymmen qamtamasyz etiledi. Jumystar Qaraǵandy, Temirtaý, Balqash, Saran, Shahtınsk qalalarynda jáne Buqar Jyraý aýdanynda júrgizilýde. Bul jumystar aıaqtalǵannan keıin turǵyndar óz úıleriniń qurylysyna kirise alady.