Úı qamaqta otyrǵandarǵa elektrondy bilezik qoldanyla bastady

NUR-SULTAN. QazAqparat – Qazaqstannyń sybaılas jemqorlyqqa qarsy qyzmeti úı qamaýyndaǵy kúdiktilerge elektrondy bilezikter qoldana bastady. Bul týraly AntikorNews baǵdarlamasynda QR Cybaılas jemqorlyqqa qarsy is-qımyl agenttigi tóraǵasynyń tsıfrlandyrý jónindegi kómekshisi Aslan Qusaıynov aıtty, dep habarlaıdy QazAqparat tilshisi.

«Halyqaralyq tájirıbeni eskere otyryp, Agenttik qamaýǵa alýmen baılanysty emes adamdarǵa qatysty bultartpaý sharalaryn qoldanǵan kezde baqylaýdyń elektrondyq quraldary - bilezikterdi qoldana bastady. Bıyl 17 qyrkúıek kúni bul tájirıbe alǵash ret sybaılas jemqorlyqqa qarsy qyzmetpen Qaraǵandy qalasynyń mamandandyrylǵan tergeý sotynyń sheshimimen qylmystyq is boıynsha kúdiktige qatysty úı qamaý túrindegi aldyn alý sharasyn tańdaý kezinde qoldanyldy. Elektrondyq qadaǵalaý quraldaryn kııý erejeleri kúdiktige tıisti mindetterdi qabyldaı otyryp túsindirildi. Sondaı-aq, kúdikti jalpy densaýlyǵy men qarsy kórsetilimderiniń bolmaýy boıynsha medıtsınalyq tekserýden ótti», – deıdi Aslan Qusaıynov.

Onyń aıtýynsha, elektrondy bilezikterdi qoldaný kúdiktilerdiń tergeý men sottan qashý áreketterin boldyrmaýǵa múmkindik beredi. Elektrondyq bilezikterdi qoldaný qylmystyq jazany izgilendirý talaptaryna sáıkes keledi jáne jaqyn bolashaqta qamaýdaǵy adamdardyń sanyn azaıtýǵa múmkindik beredi.

«Elektrondy bilezik – kúdiktiniń nemese aıyptalýshynyń aıaǵyna taǵylatyn radıoelektrondyq modýl. Bilezik barlyq qaýipsizdik erejelerine sáıkes keledi. Bileziktiń salmaǵy shamamen 80 gramm. Elektrondyq bilezik taǵylǵan adamnyń qaı jerde ekenine kóz jetkizý kerek bolsa, dıspetcher bir batyrmany basady jáne 5 mınýt ishinde bilezik taǵylǵan adamnyń beınesin, daýysyn tekserý týraly habarlama keledi», - deıdi ol.

Baǵdarlama barysynda Aslan Qusaıynov elektrondy bileziktiń qandaı bolatynyn, onyń qalaı qoldanylatynyn kórsetti.