Úı-ishiniń mazasyn alǵan aqtóbelik polıtsııa qyzmetkerin pyshaqpen jaraqattaǵan
AQTÓBE. QazAqparat - Aqtóbe qalasynyń turǵyny mas kúıinde otbasynda janjal shyǵaryp, shaqyrýǵa barǵan polıtsııa qyzmetkerin pyshaqpen jaraqattaǵan, dep habarlaıdy QazAqparat tilshisi.
Aqtóbe qalalyq polıtsııa basqarmasy jedel basqarý ortalyǵynyń «102» telefonyna «Geolog-2» baý-baqsha ujymynyń turǵynynan habarlama tústi. Ol er adam mas kúıinde janjal shyǵarǵanyn aıtqan. Shaqyrýǵa ýchaskelik polıtsııa ınspektorlary bardy.
«49 jastaǵy áıel kúıeýiniń pyshaq ustap, qorqytqanyn, mazasyn alǵanyn jetkizdi. Polıtsııa ony ustaýǵa tyrysqan kezde qarsylasyp, ınspektordy jaralady. Polıtseıler tártip buzýshyny polıtsııa bólimine jetkizdi. Bılik ókiline baǵynbaǵany úshin sotqa deıingi tergeý júrgizilip jatyr. Polıtsııa qyzmetkerleriniń laýazymdyq mindetterin atqarý kezinde olarǵa qatysty qorlaýǵa, baǵynbaýǵa jáne kúsh qoldanýǵa baılanysty qylmystardy tergeý ishki ister mınıstrliginiń erekshe baqylaýynda bolady. Árbir derek boıynsha muqııat tergeý júrgiziledi»,- dep habarlady oblystyq PD baspasóz qyzmetiniń jetekshisi Erbolat Sarqulov.
QR QK-niń «Bılik ókiline qatysty zorlyq-zombylyq qoldaný» baby boıynsha úsh jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý túrinde jaýapkershilik kózdelgen. Bılik ókiliniń zańdy talabyna nemese ókimine baǵynbaǵany úshin QR QK 379-babyna sáıkes kúdiktini 40 táýlikke deıingi merzimge qamaýǵa alýǵa bolady.
