Úı de, aqsha da joq: Aqtóbelik depýtattar áıelderiniń qujatyn paıdalanyp alaıaqtyq jasady
AQTÓBE. KAZINFORM — Depýtattarǵa alaıaqtyq, jalǵan qujat jasaý jáne qylmystyq jolmen tapqan aqshany zańdastyrý isi boıynsha aıyp taǵyldy. Sotta prokýror 672 mln teńgeniń qalaı zańsyz jumsalǵanyn tizbektep berdi.
№ 2 Aqtóbe qalalyq sotynda Muǵaljar aýdandyq máslıhatynyń tóraǵasy, depýtaty jáne Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshyǵa qatysty is qaraldy. Sýdıa sottalýshylardyń aty-jónin atap kórsetpeýdi mindettedi.
Olarǵa Qylmystyq kodekstiń «Qylmystyq quqyq buzýshylyqqa sybaılas qatysýshylar», «Alaıaqtyq», «Qylmystyq jolmen alynǵan aqshany jáne ózge de múlikti zańdastyrý», «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» baptary boıynsha aıyp taǵyldy.
Prokýror Temirlan Ibragımniń aıtýynsha, 2019 jyly ashylǵan «Muǵaljar Otan» JShS-ne úsh adam ıelik etedi. Quryltaıshylardyń biri ári depýtat 2021 jyly ózge áriptesteriniń úlesin ózi ıemdený úshin jalǵan hattama toltyryp, qujat jasap, resmı tirkep alady. Ol «Otan» qoǵamdyq qoryna 81,6 mln teńge, «Muǵaljar Otan» JShS-ne 16 mln tg materıaldyq shyǵyn keltirgen.
Qazir oǵan osy isi úshin Qylmystyq kodekstiń «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» baby boıynsha aıyp taǵyldy.
Sonymen birge depýtat Qylmystyq kodekstiń «Alaıaqtyq» baby boıynsha sot aldynda jaýap beredi. Ol Muǵaljar aýdandyq máslıhat tóraǵasymen, Muǵaljar aýdandyq sáýlet, qurylys jáne qala qurylysy bólimi basshysynyń mindetin atqarýshymen birge alaıaqtyq jasady.
Máslıhat tóraǵasy 2020 jyly «Bazıs» JShS-ne 5 qabatty ǵımaratty 8 mln teńgege satyp alady. Jalpy aýdany — 4 431 sharshy metr. Ǵımarat ataýy — jataqhana. Bir jyldan soń aýdandaǵy az qamtylǵan, muqtaj otbasylardy baspanamen qamtý baǵdarlamasy aıasynda úı alýǵa bıýdjetten qarjy bólinetinin bilip, alaıaqtyq isin iske asyrýdy oılaǵan.
Sóıtip Aqtóbe oblysy Muǵaljar aýdanyna alǵashqy kezde 11 páter úshin 105 mln teńge bólinedi dep sheshim qabyldanady. Biraq sol kezdegi oblys ákimi Eraly Toǵjanovtyń sheshimimen taǵy 59 páterdi qosyp, barlyǵy 70 páter alý josparlanady.
— Muǵaljar aýdandyq máslıhat tóraǵasy men depýtat arasynda dostyq, iskerlik qarym-qatynas ornaıdy. Keıin máslıhat tóraǵasy úshinshi bir senimdi tulǵany tabýdy tapsyrady. Al máslıhat depýtaty eń senimdisi áıeli dep tanyp, kelisedi. 11 páterge taǵy 59 páter qosyp, barlyǵy 70 páter alýǵa qarjy bólýge sheshim shyǵady. Ol úshin Aqtóbe qalasy men birneshe aýdanda páter alý sany qysqarady. Sóıtip depýtat J. áıeliniń atyna qujattardy rásimdep, konkýrsqa qatysýdy josparlaıdy. Jataqhanaǵa zańsyz jolmen montajdaý jumysyn júrgizip, 70 páter etip bóledi. 2023 jyly «Jańa otaý» JShS-ne baryp, baǵalaý júrgiziledi. Qujat boıynsha nysan baǵasy — 832,8 mln teńge. 2023 jyly Memlekettik satyp alý konkýrsy jarııalanady. Jataqhana tehnıkalyq talapqa saı kelmese de, ıaǵnı gaz ben ystyq sý qubyry tartylmasa da konkýrsqa qatysyp, jeńimpaz dep tanylady. Qujat boıynsha máslıhat depýtaty J-niń áıeli jeńimpaz dep tanylyp, qarjy sonyń banktegi esepshotyna aýdarylady, — dedi prokýror Temirlan Ibragım.
Onyń aıtýynsha, Muǵaljar aýdandyq sáýlet, qurylys jáne qala qurylysy bólimi basshysynyń mindetin atqarýshy 70 páterge 672 mln teńgeni aýdaryp jiberedi. Aqsha depýtattyń áıeliniń esepshotyna túsken soń onyń 630 mln teńgesi Muǵaljar aýdandyq máslıhat tóraǵasynyń áıeliniń esepshotyna aýdarylady. Qalǵan 42 mln teńgeni depýtat ózinde qaldyryp, ózi jumsaıdy. Al máslıhat tóraǵasy áıeliniń atyndaǵy aqshany depozıtke salyp, 67 mln teńge paıda tapty. Tergeý jumystary bastalǵan kezde aqshany zańdastyrmaq nıetpen birneshe jyljymaıtyn múlik satyp aldy.
— Muǵaljar aýdandyq sotynyń qaýlysymen 2023 jylǵy kelisimshart zańsyz dep tanylyp, depýtattyń áıeline 672 mln teńgeni qaıtarý týraly sheshim qabyldandy. Oǵan ǵımarattyń ishin qaıta bólý qujatynyń bolmaýy sebep boldy. Aktti ýaqytyly almaǵan. Búginge deıin bes qabatty ǵımarattyń qujaty jataqhana dep tirkeýli tur. Úı ishindegi qabyrǵalardy buzý, qaıta jańǵyrtý kezinde tehnıkalyq talaptar saqtalmady. Gaz jáne ystyq sý tartylmaǵan. Aýdandyq máslıhat tóraǵasy men bólim basshysynyń mindetin atqarýshy munyń bárin bilip, óz qyzmetterin asyra paıdalandy. Sonymen birge máslıhat tóraǵasy Q. qylmystyq jolmen tapqan aqshany zańdastyrý úshin Qandyaǵash qalasynan birneshe nysan satyp aldy. «SNPS-Aqtóbemunaıgaz» AQ-nan 279 sharshy metr bolatyn nysandy 11,7 mln teńgege, Qandyaǵash qalasyndaǵy páterdi 9,8 mln teńgege satyp alady. Sonymen birge «SNPS-Aqtóbemunaıgaz» AQ-nyń taǵy bir habarlamasyn kórip, aýdany 2 503 sharshy metr bolatyn nysandy 123,5 mln teńgege alady. Qylmystyq kodekstiń 218-baby 3-bóligi 1, 3-tarmaǵy boıynsha qylmystyq is jasady. Qylmystyq jolmen tapqan aqshany zańdastyrdy, — dedi sotta prokýror.
Aıta keteıik, 2023 jyldyń jeltoqsanynda Muǵaljar aýdanynyń sáýlet, qala qurylysy jáne qurylys bólimi men jeke tulǵa Aqsezim Ábdikárim arasynda 70 páterdi satyp alý kelisimsharty jasaldy. Kelisimge sáıkes 70 páterge (bir bólmeli — 20 páter, eki bólmeli — 25 páter, úsh bólmeli — 25 páter) jylý júrgizilýi, qabyrǵalarynyń barlyǵy boıalǵan taza túrinde bolýy, edenine lınoleým jaıylýy, as bólmesinde gaz plıtasy ornatylýy, jýynatyn bólmede vanna (metall, emaldalǵan bolat) nemese dýsh kabınasy, bólme aralyq jáne kire beris temir esikter bolýy tıis. Bul týraly QazAqparat tilshisine byltyr Aqtóbe oblysy boıynsha ishki memlekettik aýdıt departamentiniń basshysy Sáken Qasymov aıtyp berdi. Osy oqıǵadan keıin Muǵaljar aýdanynyń ákimi Darhan Ermaǵambetov qatań sógis alǵany belgili. Ári qaraı isti Antıkor tekserdi.