Úı de, aqsha da joq: Aqtóbede kásipker bıýdjet shyǵynyn aqyry ótemedi

AQTÓBE. KAZINFORM – Aqtóbelik kásipker kezekte turǵandarǵa daıyn úı beremin dep ákimdikten aqsha alyp, kelisimshart mindetterin tolyq oryndamady. Sot bıýdjet shyǵynynyń ornyn toltyrýǵa úkim shyǵarǵanymen, kásipker ótemedi.

Muǵaljar aýdany Qandyaǵash qalasyndaǵy 5 qabatty úı áli bos tur. Bul úıdi tapsyrýy tıis jeke kásipker Aqsezim Ábdikárimniń isi sotta qaralyp, oǵan 672 mln teńge shyǵyndy qaıtarý týraly úkim shyqty. Keıin bıýdjetke 359 mln teńge aýdarylǵany belgili boldy. Biraq bul da zańǵa qaıshy. 

- Aqsezim Ábdikárim sot sheshimin oryndaý úshin 359 mln teńge bıýdjetke aýdarǵan. Biraq ol óz atynan emes, ózgeniń esepshotynan jiberdi. Ádilet departamenti zańsyz dep keri qaıtaryp jibergen. Sóıtip bıýdjetke eshteńe túspegen. 0 teńge bolyp tur. Jaǵdaı qıyndap ketti,- dedi Aqtóbe oblysy boıynsha ishki memlekettik aýdıt departamentiniń basshysy Sáken Qasymov. Osy oqıǵadan keıin Muǵaljar aýdanynyń ákimi Darhan Ermaǵambetov qatań sógis alǵany belgili. 

Aıta keteıik, bul istiń Antıkorǵa túsken, túspegeni ázirge belgisiz.

Eske salsaq, Qandyaǵash qalasynda turatyn adamdardy baspanamen qamtý maqsatynda bıýdjetten 672 mln teńge qarastyrylady. Bul qarjy jeke tulǵaǵa aýdarylǵan. Sebebi ol 5 qabatty úıdi daıyn kúıinde tapsyryp, al ákimdik ony satyp alýy tıis edi. Qujattar dál osylaı kórsetilgenimen, is júzinde birneshe zańsyzdyq anyqtaldy.