Úı almaq bolǵan óskemendik alaıaqqa 7 mln teńge bergen

Óskemen qalasynyń turǵyny memlekettik baǵdarlama boıynsha páter alyp berýge ýáde etken alaıaqqa aldanyp qaldy, dep habarlaıdy Kazinform. 

ShQO polıtsııa departamenti baspasóz qyzmetiniń málimetine súıensek, 24 jastaǵy áıel adam Óskemen qalalyq PB Ertis polıtsııa bólimshesine kelip, alaıaqqa aldanyp qalǵanyn jetkizdi.

«Onyń aıtýynsha, osy jyldyń sáýir aıynda tanysy memlekettik baǵdarlama boıynsha páter alýǵa kómektese alatynyn aıtqan. Buǵan sengen jábirlenýshi 7 mln teńgesin bere salǵan. Alaıda segiz aıdyń ishinde ol páterdi de, aqshasyn da ala almady», - delingen aqparatta.

Jedel-izdestirý sharalaryn júrgizgen polıtsııa qyzmetkerleri 22 jastaǵy kúdiktini ustady. Er adam óz kinásin tolyqtaı moıyndaǵan.

Qazirgi ýaqytta atalǵan fakti boıynsha QR QK-niń 190-baby 3-bóligine (Alaıaqtyq) sáıkes sotqa deıingi tergeý amaldary bastaldy.