Úı almaq bolǵan Óskemen turǵyny alaıaqqa 10 mln teńge bergen

ÓSKEMEN. QazAqparat – Óskemen qalasynda úı almaq bolǵan turǵyn alaıaqqa aldanyp, 10 mln teńgesinen aıyryldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, 38 jastaǵy qala turǵyny «102» jedel arnasyna habarlasqan. Ol arzanǵa páter satyp alýǵa kómektesemin degen tanysyna 10 500 000 teńge bergenin aıtty. Alaıda er adam aqsha qolyna tıgen soń múlde habarsyz ketken.

«Jedel-izdestirý sharalaryn júrgizgen polıtsııa qyzmetkerleri 30 jastaǵy jergilikti turǵyndy ustady. Belgili bolǵandaı, kúdikti jábirlenýshige jeńildetilgen baǵdarlama boıynsha páter satyp alýǵa kómektesýge ýáde bergen», - dep habarlady vedomstvo ókilderi.

Qazirgi ýaqytta atalǵan fakti boıynsha QR Qylmystyq kodeksiniń 190-baby 3-bóligine (Alaıaqtyq) sáıkes sotqa deıingi tergeý amaldary júrgizilýde.

Esterińizge sala ketsek, Memleket basshysy Qasym-Jomart Toqaev Bas prokýratýraǵa alaıaqtarmen kúresti kúsheıtýdi tapsyrǵan bolatyn.