Úı almaq bolǵan óńir turǵyndary elordalyq alaıaqqa aldandy
PETROPAVL. QazAqparat – Nur-Sultan qalasynyń turǵyny páter alýǵa kómektesýge ýáde etip, petropavldyqty 5 mln teńgege aldap ketti, dep habarlaıdy «QazAqparat» HAA tilshisi.
SQO Polıtsııa departamenti baspasóz qyzmetiniń málimetinshe, qaskóıdiń áreketinen Qazaqstannyń birneshe óńiriniń turǵyndary zardap shekken, onyń ishinde úsh petropavldyq ta bar.
Alaıaq súrilýi tıis eski úılerdiń ıelerimen baılanysqa shyǵyp, olarǵa jańa salynyp jatqan úılerden páter alýǵa kómektesýge ýáde bergen. Ol úshin bastapqy jarna salý qajettigin jáne «qol ushyn bergenine» syıaqy beretindikterin aıtqan. Osylaısha, petropavldyqtardyń biri 5 mln teńgege jýyq aqshasynan aıyryldy.
Kúdikti Nur-Sultan qalasynyń 34 jastaǵy turǵyny bolyp shyqty. Ony astanalyq polıtseıler qolǵa túsirdi. Petropavldyq tártip saqshylary tirkelgen epızodtar boıynsha materıaldardy áriptesterine tabys etti.
«Qazirgi ýaqytta alaıaqtar ınternet arqyly óz oılaryn júzege asyrady. Olar aldap alǵan málimet arqyly qashyqtan bank shotyndaǵy aqshany oljalaıdy. Kóbinese, turǵyn úıdi tıimdi satý-satyp alýǵa, qajetti qujattardy jasaýǵa «kómektesýge» nemese aqshany aınalymǵa jiberýge ýáde beredi. Alaıaqtar óz qurbandarynyń senimine kirip, qyzmet alýdy tezdetý úshin aqsha talap etedi. Adamdardy asa saq bolýǵa, kúmándi usynystarǵa senbeýge, bógde bireýlerge aqsha aýdarmas buryn muqııat tekserýge shaqyramyz», - deıdi SQO PD Krımınaldyq polıtsııa basqarmasynyń bastyǵy Petr Klımov.
Jalpy jyl basynan SQO polıtseıleri 189 alaıaqtyqty ashty.
