Úı almaq bolǵan qazaqstandyq alaıaqqa 130 mln teńgesin berip qoıǵan
ÓSKEMEN. QazAqparat – Shyǵys Qazaqstan oblysynyń turǵyny alaıaqqa aldanyp, 130 mln teńgesinen aıyryldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary alaıaqtyq jasaǵan 46 jastaǵy Óskemen qalasynyń turǵynyn qolǵa túsirgen.
«Tergeý barysynda anyqtalǵandaı, kúdikti ózine tıesili emes jyljymaıtyn múlikti satatyndyǵyn aıtyp, jábirlenýshiniń 130 mıllıon teńgeden astam qarajatyn ıemdengen. Qazirgi ýaqytta qylmystyq is sotqa jiberildi», - dedi ShQO PD bastyǵy Saǵat Mádıev.
Osy rette, departament ókilderi turǵyndarǵa alaıaqtardyń tuzaǵyna túsip qalmas úshin barynsha abaı bolý kerektigin eskertedi.
