UWW kúres túrlerinen 2022 jylǵy álem chempıonatyn Serbııaǵa aýystyrdy
NUR-SULTAN. QazAqparat - Birikken kúres álemi (UWW) kúres túrlerinen 2022 jyly Reseıde ótýi tıis álem chempıonatyn Serbııanyń Belgrad qalasyna aýystyrdy. Mundaı sheshim qabyldaýǵa Sporttyq Arbıtrajdy sottyń (CAS) uıǵarymymen Reseıdiń eki jyl boıy iri jarystardy qabyldaı almaıtyny sebep bolǵan. dep jazady Olympic.kz.
Sondaı-aq, jaǵajaıdaǵy kúresten álem kýbogi kezeńi de Reseıde ótkizilmeıdi.
Ázirge týrnırdi qabyldaıtyn qala naqtylaný ústinde. Serbııanyń Belgrad qalasynda 2023 jylǵy álem chempıonaty ótýi tıis bolǵan. Alaıda, qazirgi jaǵdaıǵa baılanysty Belgrad Krasnorıak qalasynyń ornyna chempıonatty qabyldaıdy. Al 2023 jylǵy doda qaıtadan Reseıge aýysady.
«Biz CAS sheshimi men WADA ustanymyn syılaımyz, sol sebepti, jarysty ótkizý kestesin qaıta qaradyq», - deıdi UWW prezıdenti Nenad Lalovıch.
Aıta ketelik, 2023 jylǵy álem chempıonatynda 2024 jylǵy Parıj Olımpıadasynyń alǵashqy joldamalary sarapqa salynady.
