UWW Qazaqstan palýandarynyń barys sýreti beınelengen kıim eskızin bekitti

Eske sala keteıik, bıylǵy jyldyń aqpan aıynda UWW palýandardyń jarystarda kıetin kıimine qatysty erejelerdi jańartyp, dástúrli qyzyl jáne kók tústi palýandar trıkosyn alyp tastady. Onyń ornyna sportshylar óz eliniń ulttyq týy tústes kúreske arnalǵan kıim kıedi (kúńgirt jáne ashyq tústi nusqalarynda).

Bul 2016 jyly «Olımpıadalyq kúresti saqtaıyq» baǵdarlamasy iske qosylǵannan keıin bastaldy. Sol kezden beri kóptegen sharalar, kezdesýler ótkizildi, sonyń ishinde kıimniń vızýaldyq úlgisine arnalǵan sharalar boldy, sebebi qyzyl jáne kók túster kórermender úshin qıynshylyqtar týǵyzatyn.

«Sol kezden bastap Qazaqstannyń kúres federatsııasy jańa formany ázirleýmen aınalysty. Búgin United World Wrestling Qazaqstannyń formasyn bekitti. Endi palýandarymyz Qazaqstannyń sımvoly bolyp sanalatyn qar barysy beınelengen sary-kók tústi trıkomen shyǵady», - delingen Kazakhstan Wrestling Online-niń VKontakte áleýmettik jelisindegi paraqshasyndaǵy habarlamasynda.