UWW álemdik reıtıngi: Qazaqstan balýandary maýsymdy qalaı aıaqtady

ASTANA. KAZINFORM — Kúres túrlerinen maýsym óz máresine jetti. Maýsym qorytyndysy boıynsha Birikken kúres álemi (UWW) úzdik balýandardyń reıtıngin jarııalady.

Erkin kúresten qazaqstandyqtardyń ishinde úzdik úshtikke eń jaqyn bolǵan - Asyljan Esengeldi (61 kelige deıin). Maýsym qorytyndysy boıynsha ol 39 200 upaımen 4-orynǵa kóterildi. Kamıl Kýrýglıev (92 kelige deıin) 8-orynǵa jaıǵassa, Nurqoja Qaıpanov (70 kelige deıin) 9-orynda maýsymdy aıaqtady.

Grek-rım kúresinen tórt birdeı balýanymyz úzdik ondyqtyń qatarynda tur. 2025 jylǵy álem chempıony Aıdos Sultanǵalı (60 kelige deıin) álemdik reıtıngtiń 5-shi satysyna kóterildi. Onyń enshisinde 45 000 upaı bar.

QR UOK málimetinshe, Mereı Máýletqanov (72 kelige deıin) jáne Islam Evloev maýsymdy 6-shy orynda aıaqtasa, Álimhan Syzdyqov (130 kelige deıin) 10-orynǵa jaıǵasty.

Áıelder kúresinen úsh balýanymyz Birikken kúres áleminiń reıtıngisinde ondyqqa endi. Sonyń ishinde Jámılıa Baqbergenova (72 kelige deıin) úzdik úshtikke enýge jaqyn boldy. Ol 31 500 upaımen 6-shy orynda maýsymdy aıaqtady. Vıktorııa Hýsaınova (59 kelige deıin) 9-shy satyǵa turaqtasa, Elmıra Syzdyqova (76 kelige deıin) 10-orynǵa ıe boldy.

Aıta keteıik, mınıstrlik olımpıadalyq rezervti daıarlaýǵa qoıylatyn talaptardy kúsheıtedi.