UTO magıstratýraǵa túsýshilerge «jaýap satatyn» alaıaqtardan saq bolýǵa úndedi
ASTANA. KAZINFORM — Ulttyq testileý ortalyǵy magıstratýraǵa túsýge daıyndalyp jatqan azamattardy ınternette taralyp jatqan jalǵan usynystardan saq bolýǵa úndedi.
Keıingi ýaqytta áleýmettik jeliler men messendjerlerde «keshendi testileýden ótkizip beremiz», «grantqa túsirýge kómektesemiz», «test suraqtarynyń daıyn jaýaptary bar» degen mazmundaǵy habarlamalar kóbeıgen. Ortalyqtyń málimetinshe, mundaı usynystardyń barlyǵy — alaıaqtyq áreket.
— Ár keshendi testileýge qatysýshy úshin jeke test nusqasy qalyptastyrylady. Sondyqtan ınternette taralatyn «test suraqtary» nemese «jaýaptar» naqty emtıhan tapsyrmalarymen sáıkes keledi degen aqparat shyndyqqa janaspaıdy, — dep habarlady Ulttyq testileý ortalyǵy.
Sondaı-aq vedomstvo test materıaldaryn zańsyz taratý faktileri anyqtalǵan jaǵdaıda ýákiletti organdarmen birlesip tıisti sharalar qabyldanatynyn eskertti.
Test tapsyrmalary Ulttyq testileý ortalyǵynyń zııatkerlik menshigi bolyp esepteledi. Ortalyq olardy zańsyz jarııalaý nemese taratý Qazaqstan zańnamasyna sáıkes jaýapkershilikke ákelýi múmkin ekenin eskertti.
Eske salaıyq, buǵan deıin Qazaqstanda magıstratýraǵa túsýge arnalǵan keshendi testileý bastalǵanyn habarlap edik.
