Utys daýy: bloger Erbolat Janabylovtyń advokaty isti toqtatýdy surady

ASTANA. KAZINFORM — Búgin Astananyń mamandandyrylǵan aýdanaralyq ákimshilik quqyq buzýshylyqtar jónindegi sotynda mıllıon oqyrmany bar bloger Erbolat Janabylovqa qatysty is qaraldy. 

Elorda sotynyń málimeti boıynsha, is materıaldaryna sáıkes, bloger Erbolat Janabylov jelidegi paraqshasynda júıeli túrde aqshalaı, 10 avtokólikti jáne ózge de baǵaly syılyqtardy oınatqan. Oıynǵa qatysý sharttarynyń biri — Erbolat Janabylovtyń jubaıy basqaratyn «Zhana Business» JShS-niń «oqytý kýrsy» úshin 30 000 teńge tóleý bolǵan. Jeńimpazdar «sáttilik barabany» qurylǵysy arqyly kezdeısoq tańdaý ádisimen anyqtalǵan, al bul lotereıa oınatý belgisi. Lotereıany zańsyz uıymdastyryp, ótkizgeni úshin is sotqa jetip otyr.

Sondaı-aq resmı aqparatta aıtylǵandaı, bloger Erbolat Janabylovtyń advokaty jeke qaýly shyǵaryp, ákimshilik isti toqtatýdy suraǵan.

Kelesi sot otyrysy 2025 jylǵy 15 qyrkúıekte ótedi.

Buǵan deıin Týrızm jáne sport mınıstrligi Oıyn bıznesin jáne lotereıany retteý komıtetiniń ókilderi bloger Erbolat Janabylov jarııalaǵan kýrs baǵasy negizsiz qymbat ekenin málimdegen edi. 

Búgin Astanada bloger Erbolat Janabylovqa qatysty alǵashqy sot otyrysy ótti. 

Eske sala ketsek, jelide birneshe avtokólik utysyn jarııalaǵan qazaqstandyq blogerler Erbolat Janabylov pen Elmıra Tólegenova áreketin Týrızm jáne sport mınıstrligi nazaryna aldy. Sońynda is sotqa jetken edi. 

Atalǵan jaıtqa qatysty Týrızm jáne sport mınıstri Erbol Myrzabosynov jeke túsinik berdi.