Ýtılalymǵa 10 jyl: eldegi kólik ımportynyń úlesi 84%-dan 59%-ǵa túsken
ASTANA. KAZINFORM – Bıyl elde ýtılalym tetigi engizilgenine 10 jyl tolady. Kazinform tilshisi resmı derekterge súıenip, osy kezeńde jeńil kólik ımporty qalaı ózgergenin eseptep kórdi.
Ulttyq statıstıka deregi boıynsha, 2015 jyly Qazaqstanda jańadan tirkelgen jeńil avtokólik sany 79 508 kólik bolǵan. Onyń 67 055-i ımporttalsa, 12 453-si el ishinde óndirilgen. Paıyzǵa shaqsaq, ımport úlesi 84%, otandyq óndiris úlesi 16% bolǵan.
2025 jyly ımport pen otandyq óndiristiń jıyntyq kólemi 388 929 kólik boldy. Onyń ishinde 229 985 kólik ımporttalyp, 158 944 kólik Qazaqstanda óndirilgen. Demek, ýtılalym engizilgen 9 jyldyń ishinde ımport úlesi 59%, al otandyq óndiris úlesi 41% bolyp otyr. Aıta ketý kerek, 2025 jyldyń tolyq statıstıkalyq derekteri áli jarııalanbaǵandyqtan, 2024 jyldyń derekteri negizge alyndy.
Bul neni kórsetedi?
2015-2025 jyldar aralyǵynda:
- ımport kólemi 67 055-ten 229 985-ke deıin ósti;
- otandyq óndiris kólemi 12 453-ten 158 944-ke deıin ósti;
- ımport pen otandyq óndiristiń qosyndysy 79 508-den 388 929-ǵa deıin ulǵaıdy.
Osylaısha otandyq óndiristiń úlesi 16%-dan 41%-ǵa deıin ósip, ımport úlesi 84%-dan 59%-ǵa deıin tómendedi. Absolıýt sanmen alsaq, ımport 10 jyl ishinde qysqarǵan joq, kerisinshe ósken. Al otandyq óndiris kólemi 10 eseden joǵary qarqynmen ósken.
Ónerkásip jáne qurylys mınıstrliginiń málimetinshe, osy kezeńde salanyń aqshalaı óndiris kólemi 27 eseden astam ulǵaıǵan. Ulttyq statıstıka málimeti boıynsha, avtomobıl bólshekteri men kerek-jaraqtar óndirisi 2015 jylǵy 172,9 mln teńgeden 2025 jyly 395,1 mln teńgege deıin ósip, shamamen 2,3 ese artqan. Al osy kezeńde shınalar, dızel qozǵaltqyshtary, qozǵaltqysh bólshekteri men avtokólik komponentteriniń ımporty 315,7 mln dollardan 1,9 mlrd dollarǵa deıin ósip, shamamen 6 ese ulǵaıǵan. Bul óndiris kólemi artqanymen, negizgi komponentter boıynsha ımportqa táýeldilik saqtalǵanyn jáne salanyń lokalızatsııa deńgeıi áli de shekteýli ekenin kórsetedi.
Buǵan deıin Qazaqstannan Reseı men Belarýske eksporttalatyn kóliktiń ýtılalymy óskenin jazǵan edik.