Ýtılalymǵa 10 jyl: avtoóndiris mamandarynyń sany 4,8 ese ósken

ASTANA. KAZINFORM — Bıyl elde ýtılalym tetigi engizilgenine 10 jyl tolady. Kazinform tilshisi resmı derekterge súıenip, osy kezeńde avtoındýstrııa salasyndaǵy mamandardyń sany qalaı óskenin eseptep kórdi.

Ulttyq statıstıka bıýrosynyń derekterine qaraǵanda, «Avtomobılder, tirkemeler jáne jartylaı tirkemeler óndirý» salasynda jumyspen qamtý aıtarlyqtaı artqan. 2015 jyly salada 1 995 adam jumys istese, 2025 jyly bul kórsetkish 9 745 adamǵa jetken. Bir qyzmetkerdiń ortasha aılyq ataýly jalaqysy osy kezeńde 138 myń teńgeden 570 myń teńgege deıin ósip, shamamen 4 ese artqan. Al Ónerkásip jáne qurylys mınıstrliginiń bizge bergen málimetine súıensek, 2015 jyly Qazaqstanda 17 avtomobıl brendi óndirilse, 2025 jyly olardyń sany 27-ge jetken.

— 2025 jyldyń qorytyndysy boıynsha Qazaqstanda kýzovty dánekerleý jáne boıaý sııaqty tehnologııalyq operatsııalardy qoldana otyryp, usaq toraptyq ádispen (CKD) 8 brendtiń 12 jeńil avtomobıl modeli óndiriledi. 2015 jyly Qazaqstanda akkýmýlıator batareıalary tek «Kaınar-AKB» JShS kásipornynda óndiriletin. 2025 jyly jeńil avtomobılderge arnalǵan kelesi komponentter óndirisi de jolǵa qoıyldy: avtomobıl shınalary — «Tengri Tyres» JShS (Qaraǵandy oblysy, Saran q.); avtomobıl oryndyqtary — «Almaty Autoparts Production» JShS (Almaty q.); mýltımedııalyq júıeler — «Kazakhstan Mobility Engineering» JShS (Almaty q.), — dep jazylǵan mınıstrlik jaýabynda.

Buǵan deıin Qazaqstannan Reseı men Belarýske eksporttalatyn kóliktiń ýtılalymy óskenin jazǵan edik.