Ýtılalym esebinen turmystyq qaldyq polıgondary salynady
ASTANA. KAZINFORM – Búgin Úkimet otyrysynda QR Ekologııa jáne tabıǵı resýrstar vıtse-mınıstri Jomart Álıev qaldyqtardyń barlyq túrin basqarý jónindegi tujyrymdama jobasyn tanystyrdy.
Onyń aıtýynsha, Úkimet basshysynyń tapsyrmasy boıynsha barlyq múddeli taraptardy tarta otyryp, jınaqtalǵan problemalardy júıeli sheshýge baǵyttalǵan Qaldyqtardyń barlyq túrlerin basqarý jónindegi tujyrymdama ázirlendi.
- Jalpy alǵanda, qaldyqtardy basqarý júıesi naqty esepke, zamanaýı ınfraqurylymǵa, yntalandyrý mehanızmderine jáne memlekettik organdar, bıznes jáne halyq arasynda fýnktsııalardy naqty bólýge negizdelgen fragmenttik tásilden ıntegratsııalanǵan modelge kóshýdi talap etedi, - dedi J. Álıev.
Osy oraıda ol tujyrymdama jobasyna engizilgen máselelerdiń negizgi bloktaryna toqtaldy. Birinshi blok retsiz júrgizilgen esep jáne jarym-jartylaı statıstıka máselesine arnalǵan.
Búginde qaldyqtyń paıda bolýy men qozǵalysynyń tolyq kórinisi joq:
- qaldyqtardyń 30 protsenti esepterde kórsetilmeıdi jáne baqylaý júıesinen tys qalady;
- kásiporyndardyń tek 10 paıyzy ǵana esepti elektrondyq formatta tapsyrady;
- tehnogendik mıneraldyq túzilimder boıynsha qaldyqtardyń memlekettik kadastry men
Geologııa komıteti aqparatynyń eleýli aıyrmashylyǵy bar.
- Máseleni sheshýdiń negizgi sharalary mynadaı: qaldyqtyń barlyq túrlerin tolyq túgendeý jáne qaldyqtardy memlekettik kadastryn jańartý kerek. Barlyq qaldyq túzýshilerdi aqparattyq júıede mindetti tirkeý qarastyrylǵan. Sondaı-aq jasandy ıntellektti engizý arqyly salany tsıfrlandyrý mańyzdy. Taǵy bir mańyzdy shara – qaldyqty bir rettik zańdastyrý, ıaǵnı legalızatsııalaý, bul qaldyq ıelerine esepte jazylmaǵan naqty jınalǵan kólemdi aıyppulsyz esepke alýǵa múmkindik beredi. Nátıjesinde, barlyq qaldyqtardyń naqty kórinisi anyqtalyp, olardyń paıdaly fraktsııalary aıqyndalyp, qaıtalama aınalymǵa tartý múmkindigi paıda bolady, - dedi vıtse-mınıstr.
Ekinshi blok biryńǵaı normatıvtik-quqyqtyq qurylymnyń bolmaýy problemasyn sheshýge baǵyttalǵan. Qaldyqty basqarýdyń qoldanystaǵy normalary birneshe kodeksterde, zańdarda jáne zańǵa táýeldi aktilerde kórsetilýi - talaptardyń sáıkes kelmeýine jáne fýnktsııalardyń qaıtalanýyna ákeldi. Bul baqylaý men esepke alýdy qıyndatýda jáne qaldyqty basqarýdyń biryńǵaı tıimdi júıesin jasaýǵa kedergi bolýda. Mysaly, Jer qoınaýy týraly kodekste tehnogendi mıneraldar qaldyq sanalady, al Ekologııalyq kodekste osy másele rettelmegen.
Biryńǵaı normatıvtik-quqyqtyq qurylymdy qalyptastyrý maqsatynda tujyrymdamada:
- qaıshylyqtar men qaıtalaýdy boldyrmaý maqsatynda qaldyq túrleri boıynsha zańnamany bir júıege keltirý;
- ókilettik pen jaýapkershilikti naqty bekitý, onyń ishinde qaıta óńdemegeni jáne rekýltıvatsııa jasamaǵany úshin qaldyq ıeleriniń jaýapkershiligin kúsheıtý;
- ónerkásiptik, kommýnaldyq, qurylys, aýyl sharýashylyǵy jáne medıtsınalyq qaldyqtardy basqarý tártibin jetildirý kózdelgen. Bul sharalar – barlyǵyna talaptardyń oryndalýyn jeńildetedi jáne retteýdi ashyq etedi.
- Tujyrymdamada usynylatyn negizgi sheshimderge toqtalsaq, ýtıl alym esebinen zamanaýı turmystyq qaldyq polıgondar qurylysyn qarjylandyrý pysyqtaldy. Bundaı mehanımzdi biz qaıta óńdeý jobalary boıynsha bastap kettik. Budan bólek, tarıfterdi ár 3 jyl saıyn qaıta esepteý jáne ekonomıkalyq negizdelgen modelge kóshý qarastyryldy. Munymen qosa, salyq preferentsııalary men sýbsıdııalar qarastyrý usynyldy. Óndirýshilerdiń keńeıtilgen mindettemeleri (ROP) júıesin jetildirý qaraldy. Tujyrymdamanyń taǵy da bir jeke baǵyty - qaldyqty basqarý salasynda halyq pen bıznestiń ekologııalyq mádenıetin arttyrý. Ashyq esep berý arqyly bıznestiń jaýapkershiligin yntalandyrý – Memleket basshysynyń «Taza Qazaqstan» bastamasynyń prıntsıpine sáıkes keledi, - dedi Jomart Álıev.
Budan buryn habarlanǵandaı, elde kommýnaldyq sektordaǵy qaldyqtardyń 25 paıyzy ǵana qaıta óńdeledi.