Ýtıl alymynyń kesirinen elde eski kólikter qaptap ketti – ákimshilik polıtsııa

ASTANA. QazAqparat – Ákimshilik polıtsııa komıtetiniń tóraǵasy Qaısar Sultanbaev ortalyq kommýnıkatsııalar qyzmetinde ótken brıfıngide elde eski kólikterdiń nege qaptap ketkenin túsindirdi, dep habarlaıdy QazAqparat tilshisi.

«Shetelden qosalqy bólshek retinde kirgizilgen kólikterge kelsek, olardyń tehnıkalyq jaǵdaıy bizdiń avtomobılderden nashar dep aıtpas edim. Bul avtomobılderdiń kóbi, shamamen 99 paıyzy Japonııada jasalǵan. Tipti keıbir tehnıkalyq sıpattamasy men jaǵdaıy bizdiń keıbir kólikterden jaqsyraq deýge bolady. Tek olar elimizge qosalqy bólshek retinde kirgizilgen. Adamdar kezinde kedendik baj tólegisi kelmegendikten osylaı istese kerek. Qosalqy bólshek retinde syrttan mashına kirgizý - avtomobıl retinde kirgizýden áldeqaıda arzan. ıAǵnı, shanaǵyn bólek, qozǵaltqyshyn bólek, dóńgelekterin bólek ákelgen. Osynda ákelgen soń qaıta burap, qurastyra salǵan. Sondyqtan ondaı kólikter qalypty qozǵalyp júr», - dedi komıtet tóraǵasy.

Onyń paıymynsha, eldegi kólik parki ýtıl alymy paıda bolǵan kezden bastap qatty eskirgen.

«Al ýtılalym men bastapqy tirkeý alymy boıynsha birqatar shekteýler engilizgennen keıin bizdegi kólikterdiń «jasy» 10 jyldan astam «qartaıyp» ketkenine men kelisem. Iá! Óıtkeni halyqtyń qolynda jaqsy mashına satyp alatyn aqsha joq. Ýtıl alymy men bastapqy tirkeý alymynyń mólsherlemesi sheteldik jaqsy kólikti birneshe ese qymbattatyp jiberedi. Sondyqtan bizdiń kólik parki «eskirip» ketken shyǵar», - dedi Qaısar Sultanbaev.

2015 jyly ýtılalym engizilgenge deıin Qazaqstandaǵy avtomobılderdiń «ortasha jasy» 14-15 jyl bolsa, qazir 24-25 jylǵa jetken.