Ýtıl alymyna qarsy petıtsııany qaraıtyn jıynǵa belsendilerdi telefonmen kirgizbeı qoıǵan

ASTANA. KAZINFORM — Búgin ýtıl alymy týraly petıtsııany qaraıtyn jumys tobynyń otyrysy ótýge tıis edi. Onyń nege keıinge qalǵanyn Ónerkásip jáne qurylys mınıstrligi túsindirdi.  

Bul jumys tobynyń quramyna QR Parlamentiniń depýtattary, ónerkásip jáne qurylys, ekologııa jáne tabıǵı resýrstar, qarjy, aýyl sharýashylyǵy, tsıfrlyq damý, ınnovatsııalyq jáne aeroǵarysh ónerkásibi, mádenıet jáne aqparat vıtse-mınıstrleri, QR Syrtqy ister mınıstriniń orynbasarlary, basqa da múddeli memlekettik organdardyń ókilderi kirdi.

Sonymen qatar, jumys tobynyń quramyna qoǵamdyq birlestikterdiń, sarapshylar qaýymdastyǵynyń, ónerkásip salasynyń ókilderi, sondaı-aq ýtıl alymyn joıýdy jaqtaýshylar S. Boqaev, E.Kýlbasov, D. Makeshov, D. Salykov jáne basqa da azamattar qosyldy.

Mınıstrlik barlyq múddeli taraptardy shaqyryp, jumys tobynyń otyrysyn ótkizý úshin qajetti uıymdastyrylǵan sharalardy ázirlep, jumys otyrysynyń túsirilimi jáne otyrystyń hattamasyn qamtamasyz etti.

Ónerkásip jáne qurylys mınıstrliginiń ǵımaraty — strategııalyq nysannyń barý reglamentinde kelýshiler uıaly telefondaryn ózimen birge ala almaıtyny jáne ony kire beriste qaldyrýy kózdelgenin aıta ketken jón.

Alaıda, ótinishtiń bastamashysy S. Boqaev jáne onyń ókilderi reglament talaptaryn oryndaýdan jáne jumys tobynyń otyrysyna qatysýdan bas tartty.

Osyǵan baılanysty QR Ónerkásip jáne qurylys mınıstrligine baılanysty emes sebeptermen otyrysty toqtatýǵa týra keldi.

«Otyrysqa qatysý úshin Parlament depýtattary, ónerkásip vıtse-mınıstrleri, basqa da memlekettik organdardyń ókilderi jınaldy. Óńirlerden qoǵam belsendileri keldi. Alaıda, biz josparlanǵan is-sharany toqtatýǵa májbúr boldyq, óıtkeni petıtsııanyń bastamashysy oǵan qatysýdan bas tartyp, mınıstrliktiń oǵan jumys tobynyń otyrysy aıaqtalǵannan keıin beınejazbany usynýyna kelispedi», ― dedi ÓQM baspasóz qyzmeti.

Sondaı-aq mınıstrlik aldaǵy ýaqytta konstrýktıvti dıalog kútetinin atap ótti.